4 بنات وتليفون

تحديث

شوفوا داليا هو دا عيبه كتبت اية

و كما عمو ابو همس

خالد باشا

صورنا

الفيس بوك

الحمد لله الذى بفضله تتم الصالحات

بصراحة انا متلخبطة جدا
مش عارفة احكى بس هحاول احكى التفاصيل كما
عشتها عشان اطمن الناس
ابتدى اليوم وصلت الملجأ الساعه 10.10ص
كانت ماما امولة وصلت قبلى منتظرنا

وبعدين جت داليا ودعاء
وبعدين حضر الصباغ ومعه مدونتين من القاهرة
وفى التاكسى الاخر
خالد همس الاحباب
ابن حجر العسقلانى
انا طبعا عارفة ان خالد شايل الدنيا
لكن أكتشفت ان عسقول شايل كمان شنطة سفركبيرة قلنا جايز هيبات
خاصة ان خالد سملنى الفلوس واللعب والادوات المدرسية والمكواه
ودخلنا الملجأ واول حاجة عملها عسقول نط فى الحوش وقال انا هلعب كورة
مع الاولاد وفعلا لقيت ماشاء الله الشباب اختفوا خالد وعسقول والصباغ
خالد وعسقول بيلعبوا والصباغ نازل تصوير ولعب ومحاولة فاشلة بأنه يتمرجح فى الوقت دا حضرت
(رحيل) صاحبة مدونة محاولة البحث عنى من المنصورة اللى قعدت تلعب وتجرى ورا الاطفال فى براءة غريبة
وبعدين رحنا نصلى فى مسجد صالح سليم وانا وداليا قعدنا نفرز التبرعات ونسمة ودعاء راحوا اشتروا نواقص
من فلوس المتبرعين وكانت عبارة عن بعض اللعب للاطفال وفى اثناء دا
حضر احسان بيه وشفقة هانم ومعاهم اورج ولعب الاطفال بيه وعملوا دوشة كتيررررر
بس بصراحة كانوا مبسوطين

فى اثناء اللعب مسك عبد الرحمن اللى نشرت صورتة فى البوست اللى فات


منشار وابتدى يلعب بيه ويحركة فى كل مكان واحنا كلنا حاولنا اننا نفهمة ان دا غلط
لكن لا حياة لمن تنادى 00000كمان كان المكان عبارة عن مكان مخرب وغير نظيف
واللى لاحظتة انا وداليا ان ممكن بسهولة اى حد يدخل يقول اقعد مع الاطفال ويعيش حياتة
مش هنقول لا قدر الله ممكن يغتصب بنت من الملجأ لكن يكفية شرف التحرش ؟!!!!
وفى اثناء عزف احسان للاطفال جت مديرة الدار وامرت المشرفة والاطفال بتنظيف وتنظيم


غرفة الطعام اللى احنا قعدين فها وتحولت بقدرة قادر لمكان نستطيع الجلوس فيه
لما انتهت الصلاة جم ماما امولة ورحيل والصباغ وعسقول وخالد
وابو خالد هو واسرتة لانه كلمنى الصبح عرف مكان الصلاة وقال انه هيجى
وفعلا نورنا هو والحاجة والاولاد
حاولت بأصرار انى انظم الاطفال او اننا نسألهم او حتى نسكتهم عشان نعرف نعمل مسابقة
ثقافية او اى حاجة لكن طبعا كانت النتيجة فشلى وضحك داليا والصباغ على
فى اثناء دا حضرت اسرة بورسعيدية صديقة لادعاء ام وبناتها جابو
حلوى وبسكويت واداوت نظافة للاطفال
طبعا عسقول قالى ان الشنطة وظرف فيه مبلغ
مرسل من بت خيخة واى كلام للاطفال !!
بصراحة انا اندهشت جدا خيخة بالذات انا فعلا مليش اتصال بيها
الا على المدونات وحتى لم اكن اعرف انها تعلم باللقاء ولا اتصلت بيا ولا وعدتنى وعود وردية
ولا حاجة 000000 سلمنا التبرعات النقدية والعينة للدار
ووزعنا الحلوى واللعب وتوك على الاطفال وقعدنا معاهم شوية

ملحوظة

فى اطفال فيهم حنان غريب كان فى بنوتة اسمها نورهان
كل ما تتدها لعبة ترجعها تانى وعايزة بس تلعب مع حد وحتى الحلوى تديك منها وتصر على انك تاخدها
وتشاركها فيها 00 طبعا بخلاف الشقاوة الرهيبة فى كمان اطفال عندهم اكتئاب اه والله مش راضين يتكلموا
انا جيت اتكلم مع بنوتة تقريبا 14 سنة كانت زعلانة جدا وكأنها بتقول انتى جاية تتفرجى علينا فزينب ( العروسة)
اللى عندها 21سكتتها واعتذرت لى وقالت معليش اصلها زعلانه 0000 بصراحة انا اللى اعتذرت وانسحبت
لانى حسيت اد اية احنا مقصرين فى حق البنات والاولاد دول

وفى اولاد صغار فى السن كانوا

فى حالة هدوء غريب وحزن شديد مش عايزين يأخدوا حاجة ولا يتكلموا

ولا يلعبوا اللهم الا انهم رافضينا

مشينا من الملجأ فى الاتجاه لبورفؤاد ( ابو خالد وزوجتة وابنه خالد * شفقة واحسان *خالد همس الاحباب*عسقول * الصباغ*ماما امولة *رحيل )

واحنا فى راحين لقيت مدون بيتصل بى وقالى معرفتيش الملجا فين انتم فين فحددت له المكان وجى فعرفته على المجموعه سلم وقالى انا اسف بس معرفتيش اوصل وساب لى شنطة فيها تبرعه واستذن ؟!


المدون دا كان ابو العربى بصراحة جزاه الله خيراا
ركبنا المعدية وكان نفسى جدا خالد او عسقول او حتى الصباغ
يدفعوا حق الركوب لكن محمد احسان بيه عرفهم انى بشتغلهم
فى المعدية انضم لنا 3 مدونين بورسعيدية محمد الكتاتنى وكريم ومحمد
وبعدها حضروا اصدقاء الصباغ المدونتين ومعهم مدون اخر بورسعيدى
اسمه جاسر
قعدنا فى النادى اتغدينا واتكلمنا وفى واحد الظاهر السمك بيأثر عليه سلبا
وضحكنا بجد من القلب كتيررر وبعدين مشينا على الممشا و ديليسيبس
واكلنا ايس كريم والدنيا بجد كانت برد ودخلنا فودافون وكانت فى طلقات نارية فى الشارع
طبعا دا مش صدفة لالالا دى كانت بتوصية مننا ترحيبا بالضيوف << محديش يصدق دى
وركبنا وروحنا ويارب يكون اليوم كويس للاطفال والمدونين اللى جم من القاهرة والمنصورة



المتبرعين


فاتيما * قلب مصرى * داليا قوس قزح * سكر *بت خيخة واى كلام *ابو العربى

دول غير اللى حضروا طبعا

التبرعات اللى خدنا بها ايصالات
50 كراسة رسم ك * 29 علبة الوان خشب *25علبة الوان فلومستر *20 كراسة رسم ص *10 كشكول

*2الوان شمع
12 براية *30 استيكة *24 قلم رصاص *****4 شامبو *10 قطع صابون ديتول *4 قطع كامي*زجاجة ديتول
1 كرتونةصابون 24 قطعه *18 كيس اريال *جركل صابون 10 لتر * باكت كادليز 52 قطعه *دسته مناديل
12علبة استخدامات طبية *7علبة انيتال *5 لايسيد *2 برامول *2لاكسيل شراب *5 دياكس مطهر معوى *سافلون
12مكركروم *35 قطعه بلاستر *2 علبة بلاستر *20 بكرة شاش *3 اكياس قطن 250 جم الواحد * اورج كهربائى
مكواه * مبلغ نقدى مفرش للعروسة بس دا لم يسجل بمحضر
اسفة على الاطالة لكن جنة وفاتيما وايمن بدر وسكر وقوس قزح
الكل عايز يعرف التفاصيل
شكرا لكم بجد شكرا لقوس قزح على التعاون والنصيحة والمشاركة
شكرا لجنة اللى كانت بتحاول تشارك بأى شئ وتتابع من السعودية
شكرا لخالد وعسقول على الشيلة شكرا للى مش قدر يجى بس دعا لنا
والصباغ ورحيل وشفقة واحسان اللى جايين من بلد تانية


البوست اسمه 4 بنات وتليفون
لان هم دول اللى جهزوا اللقاء والتزموا
داليا ودعاء ونسمة
وتلفون على مدار اليوم مع الناس
قوس قزح وخالد وعسقول والصباغ

وحتى مع الناس عشان ادعوهم
سمعت وعود كتير لكن اسوئهم اعتقد انهم عارفين نفسهم والحمد لله
مش احتجنا حد ولا كنا منتظرين شئ غير اننا نعمل خير ونقعد نفكر بصوت مسموع

شكرا لكل اللى اعتذروا لاننا كنا بس عايزين نعرف مين جاى عشان ننسق
وان شاء الله تتكرر اللقاءات
ويارب يكون اليوم بجد حلو
دى صورة مؤقتة لحد ما نشوف صور الصباغ