بحث هذه المدونة الإلكترونية

لسة فى امل


فى بعض الناس هنا 
عارفة انى كنت احد المراقبين على العملية الهزلية للانتخابات المصرية
وكلنا عارفين ان النتيجة معروفة ومحسومة من فترة لصالح أناس بأعينهم
 بس
انا حابة احكى لكم واقعه لم تستغرق 10 دقائق  حصلت معايا وانا راحة اللجنة 
استوقفت تاكسى تقريبا الساعه 6.30 ص  وقلت له من فضلك عند مدرسة ....
الراجل قالى راحين لجنة قلت ايوة ان شاء الله قالى هتنتخبوا الوطنى ؟ قلت لا خالص 
قالى بالله عليكم ما تنتخبوا الوطنى 
قلت احنا مراقبين 
بصل وراه وقالى انا مركب ناس جامدة معايا بقى 
قلت خالص احنا عاديين جداا  .... احنا اللى بننضرب 
قال لا ربنا يحميكم  بس بالله كونا ع الاقل محايدين
قلت احنا محايدين لكنا  لا نحب الوطنى 
قالى خربها 
المهم الراجل رفض بشدة انه ياخد فلوس منى انا ونسمة 
لكنى اصريت وقعد يدعى لنا ربنا يحميكم انت شباب مصر 


بصراحة الموقف على بساطتة الا انه آثر بى جدااا


المشهد التانى 
جمال  الشباب اللى لف وتعب وانضرب  واتهدد واتسرق موبايلاتة 
لا انكر ا فينا ناس لا يملكون لا فكر ولا حتى مبدأ لكن أقسم ان فى شباب  بجد
كانوا حاسين انها مسألة مصيرية وانهم هينقلوا اللى بيحصل وهيقولوا احنا اهو 

اعرف انه يمكن ان لا تكون هناك جدوى من تلك المشاهدات البسيطة الا ان التغيير يبدأ بخطوة وبكلمة 
وبأيمان وعناد وقتال اصحابة 
لسة فى امل يا شباب   لسة فى محاولة لايقاظ مصر  وانقاذها 

مشاهدة اخيرة فى احد المواقع اللى دربت ناس كتيرة جدا على الرقابة 
لم تؤتى ثمارها ولم تواكب الحدث لكنى اقول اولا تعزى الحارة   لكن ذلك يرجع ان اغلب عاملى الموقع 
ناس بتشتغل من اجل المادة والفلوس والشهرة والخدمات الشخصية فقط لا غير 
حتى فى السياسة لابد من اصلاح النوايا لان كل الاعمال لله عز وجل 

انجازات الحزن الحاكم

كنا نتحدث عن ازمة المياة 
ومشكلة مصر مع دول حوض النيل 
الان وبفضل تغافل مصر لدورها الافريقى 
وتراجع علاقاتها مع دول النيل 
أصبحت  مصر مهددة بتخفيض حصة المياة
والادهى ان اثيوبيا تهدد مصر بالحرب التى  لن تخسرها 

بؤجة الخير بؤجتنا كلنا



كل سنة وانتم بخير وعيد سعيد عليكم جميعا
بمشيئة الله تعالى تقرر تحديد ميعاد بؤجة الخير الشتوية

الميعاد : الجمعة الموافق 10 ديسمبر 2010
المكان : جمعية صحبة خير بمسجد زهراء مصر القديمة
الزمان : من العاشرة والنصف صباحا امام مقر الجمعية الكائن 20 شارع احمد خيرى فوق كافتيريا السرايا بعد محطة مترو الزهراء بحوالى 100 متر تقريبا
دى خريطة لمحطة مترو الزهراء و لونها بالازرق اما اللون الاحمر فهو لمكان المسجد وده اسهل للناس اللى هتستخدم المترو

فى حالة اى استفسار او حد تاه عن المكان ممكن يتصل على الرقم ده

خالد همس الاحباب
0101345140
وبعد الانتهاء من تسليم البؤج وصلاة الجمعة فى أقرب مسجد سنتوجه الى مكان قريب لتناول الغذاء وغالبا هيكون فى منطقة السيدة زينب او نادى المحامين .
وفكرة البؤجة تتلخص فى الاتى
- بما انكم طالعين من العيد واكل الفتة واللحمة عمل عمايله معاكم فبساطة كده انت وبتبدل الملابس الصيفى بالملابس الشتوى تشوف ايه اللى انت مش محتاجه منها يكون ضاق عليك او خلاص زهقت منه او موضته خلاص فات اوانها او ربنا كرمك وعامل دايت وتجمع الحاجات دى مع اى حاجة تكون مش عايزها فى بيتك ملايات - فوط - احذية - ادوات منزلية - اى حاجة انت مستغنى عنها و نروح كلنا لعشوائيات اسطبل عنتروعزبة خيرالله ونديها للناس هناك فى جمعية صحبة خير وهم بيخدوها و بيعملوا بها معرض للاسر الفقيرة و تتباع لهم الحاجات باسعار رمزية و المبلغ اللى يتجمع من المعرض بتستغله الجمعية فى عمل خيرى تانى و ده علشان الناس اللى هتتباع لهم الحاجة تحس انها اشترتها بفلوسها وانها مش متسولة.
يا ريت واحنا بنقرا البوست نفتكر انه فى الوقت اللى عندنا فيه حاجات كتير قوى مش بنحتاجها وبنقول لنفسنا خليها مركونة يمكن نحتاج لها تاكد ان ربنا سبحانه وتعالى هيعوضك خير منها فى الدنيا والاخرة .
وكمان تخيل برد الشتاء القارص وتخيل ولو لثوان انك مكان الشخص الفقير او إن ابنك اواخوك فى مثل هذا الموقف فماذا تفعل من اجلهم ؟؟؟!!!
والتبرع ممكن يكون بأى شىء عينى او مادى او حتى معنوى بوجودكم ومشاركتكم وتشجيعكم للاخرين .
ياريت كل مدون يقدر ينزل بوست عن الموضوع يبقى جزاه الله خيراعلشان نبلغ اكبر عدد ممكن .
والدال على الخير كفاعله
جزاكم الله خيرا
منقول بالنص 
من مدونة همس الاحباب
جزاه الله خيرا 

لقطات

مش عارفة لية كل ما اكتب موضوع منشروش؟!!

المهم لقطات من ارض الواقع المؤلم 

وطنى على ما تفرج 
. بعض اعضاء الحزن الوطنى  اعضاء به اما على حد قولهم لتغييرة من الداخل !!!!
او لتكوين شبكة علاقات كبيرة بعلية القوم  لو لما يحقق لهم الحزب احلامها . يبقى ساعتها فقط تطلب الحالة نضال !!!

أغلب المستقلين لما يدخلوا المجلس الموقر برجلهم اليمين  يدخلوا برضة الحزن فى نفس التوقيت بالرجل التانية 
عشان كدة ربنا خلق لنا رجلين !!!

المناضلين الشباب اعزهم الله 
منهم من هو مناضل بجد ومنهم من لم يجد لاكل العيش طريق سوا كلمة مناضل 
واللف ع الاحزاب ومعاهد ومراكز حقوق الانسان ليل ونهار لعلها تفرج !!

كترت اوى معاهد ومركز حقوق الانسان ودا مش   وحش أبدا لكن  السؤال بيصرفوا منين؟؟

كفاية هلفطة كدة النهاردة 
واتكل انا بقى 

المعونة الملعونة

سؤال  أعلق عليه موضوع !!!

هل تعتقد حقا ان امريكا تريد النهوض بحال مصر 
ومؤمنة بالتغيير والاصلاح السياسى ؟؟؟




ان كان لا  أذا لما تقدم لنا المعونة الامريكية من اجل تريب كوادر شبابية فى مجال السياسة  ؟؟

واللهى قبل ما اتجنن  بس حد يكلمنى  بالمنطق وبما يرضى الله