بحث هذه المدونة الإلكترونية



تخاريف صيام

تحديث لابد منه
كتب أ/ احمد كمال موضوع رائع
له فكر متميز عن توحيد الصف والقلب والجوارح
تعالوا نحاول نشوف هو كتب اية فى
*********************
تخاريف صيام
الظاهر والله اعمل ان الصيام السنة دى عامل عاميلة
والناس متبهدلة ومدهولة على سنينها
بس ياترى السبب
الصيام فعلا ولا هى تلاكيك وخلاص
عموما اللهم انى صائم



بس هناخدهم شوية على الماشى كدة


عجبنى جداا سلسلة رمضانيات
لاحد المبدعين الشباب 00 احد عباقرة الغد
ان شاء الله
خد حادثة الهجرة وحولها لحادثة عشق وتبادل قبلات فى الغار
واللى يعترض يأخد الباب اللى يفوت جمل
مش عايزة أقول اللالفاظ اللى اتقالت

بس انا فعلا مصدومة




فى حد سرق اكونت ابــــــــــــــــــــــــى بنتجانى
ونزل سب فى خلق الله
؛؛؛
ولما دخلت أقرأ الاكونت بتاعه
الاقى الباشا كاتب
انه مش بيحب يقرأ فى القران الكريم
وهل تقرأ الشياطين كلام الله عز وجل
؟؟؟



مع بداية رمضان انتشرت مافيا التسول بشكل غير معقول
ولا حول ولا قوة الا بالله 00 لا ويقول اصلى عايز أأكل عيالى حلال
هو التسول وانت قادر على العمل حلال ؟؟؟؟



حالة من الهم والغم والحزن تجتاح رمضان السنة دى
ياترى السبب غلاء المعيشة ؟؟؟
ولا كسرت النفس وشدة الحاجة؟؟
ولا الله وحدة اعلم





ياترى مستشفى 57357
هى بس اللى تستحق التبرع ولا فى كمان مستشفيات تانية فى مصر
محتاجة لعين الرأفة وفيها مرضى من البشر ؟؟






مائدة الرحمن
هلى هى فعلا ابتغاء وجـــــــــــه الله
ام انها دعاية ناجحة للبعض ؟؟








ياترى فى لسة حد فاكرة حادثة الدويقة ؟؟
ولا
اهم خدوا الشر وراحوا




تلاقى الناس عمالة تتخانق وتشتم وتسب
بالالفاظ مش ممكن وفى الاخر اللهم انى صائم
طيب كان فين الصيام من الاول ؟؟؟

الزكاة
هل فعلا كل واحد بيطلع الذكاة بما يرضى الله
ولا يعم مدئيش وخليها على الله
وكفاية عليه الضرايب
والكلام للكل ابن عز وابن الشعب
؟؟؟

حزب بلا مقر

لقاء أبو الريش
كان تجمع أكثر من رائع وناجح بشكل كبير
جزاى الله القائمين عليه كل الخير يارب العالمين
شكرا لكل اللى جم اللقاء وربنا يجزيهم خير
واللى ما جوش يارب تقدروا تجوا المرة الجاية
قلوبكم كانت معانا واللى نجحنا دعواتكم

تعرفت بصورة أكبر على بعض الناس اللى كنت شفتهم من قبل
ولا املك سوى ان احترمهم أكثر

تعرفت على مدونين اول مرة اشوفهم لكنها أن شاء الله لن تكون الاخيرة


************************
اجمل ما فى الموضوع بتاع اللقاء
انه خالص لوجه الله الكريم

************
فرحت جداا
لما بهرنا العاملين فى المستشفى بعددنا وكمان اننا مش جمعية اهلية
ولا اى شئ له صفة رسمية

************

كل طفل يا أبطال خد
شنطة بها لعب تناسب سنة وحلوى
وظرف فية مبلغ
وفى كمان اطفال خدوا ملابس تناسب اعمارهم

*******************
فى ناس جم لمجرد السمع زى مدام ايناس وساجى
جم بعد ما شافوا الدعوة على الفيس بوك
جزاهم الله خيراا

**********

أستاذ احمد كمال حضر كالعادة فى صمت وانسحب بنفس الطريقة
بس وزع علينا كتاب قيم :)
**************
بابا أبو خالد
هذا البطل الصامت
رجل ربنا يديه الصحة ويبارك فى عمره ابو المدونين على حق
يعطى الكثير من الفكر والاهتمام والحنان وحتى التوجية بشكل لطيف
كان له الفضل بعد الله عز وجل فى تجميع الناس

*********
داليا قوس قزح
ابى البتنجانى
بذلوا مجهود جميل وكبير
وحاولوا يكونوا مع كل الناس وبشكل هادئ وراقى وفعال
ربنا يبارك لهم
سوووووووو عجوز وعندة 60 سنة
مش 30 محديش يصدق حكاية 30 دى اشاعات !!
حجز لنا المطعم وكنا عدد ماشاء الله يسد عين الشمس



***************
بصوا هحاول افتكر ومحديش يزعل لو نسيتة
بس والله انا كنت مهيسة جدااا وفى قمة تعبى
لانى طبقت يومين وركبت منخول زى اللى فى المعمورة كدة
وانا جاية من بورسعيد فنزلت انا وجنة وكأننا بنلف حولين نفسنا
ههههههههه غير انى وقفت على رجلايا كتير رغم انى كنت محافظة عليهم
ومش بقف ولا بمشى كتير عشان اكتبهم فى القايمة مش مستخدمين
بس يالله ربنا يعوض علينا ههههههههههههههه


أبو خالد الاب الروحى لنا جميعا لولاك لما هان المشوار
جنة انسانة كل مرة احبها واحترمها اكثر
نسمة اختى قلبها خفيف جداا

همس مصرية مفروسة اند متغاظة شكلها هتغير اسم مدونتها من كتر ما
اتلخبطت انا فيه 000 بنوتة جميلة وبسيطة وتلقائية
سومة مجنونة فى بلد عاقل لا املك الا انى احبها فى الله واحترامها جداا
ريمو بنات صاحبة الجلالة بنوتة جميلة وجدعه جدااا وعايزة تعرف وتتعلم
شيماء سمير مفاجأة خلق ودين وطيبة وروح وجمال 00 الله يبارك بيها
نرمين زين الدين هدوء واخلاق
نونا صاحبة مدونة المهاجر طيوبة وجميلة
رئيسة جزب الاحلام سلوى الجمال الهادئ
المفقوع مرارتها جميلة وطيبة جداا واخواتهم
رودى بنوتة مصرية مش ممكن تفوت لقاء
ميرا امرأة بعقل رجل**** شقية وجميلة
دعاء مواجهات *** جميلة
كيكى ** طلعت غير الرعب المتحرك فى المدونات
بنوتة جميلة وهادية ورقيقة خالص
ام البنين ربنا يحميها هى واولادهم يارب جميلة بأستمرار
وزة وسارة سوسارة بنات جمال جداا
شيماء زاهر اول مرة اشوفهاا بنوتة هادية وكان باين عليها الخضة من الموقف زى تمام
مدام ايناس واختها ساجى
وابنها عمر ربنا يبارك فيهم يارب واديما نتقابل فى الخير
أيناس انسانة جميلة
وساجى كانت بتحاول تساعد بكل شكل
زهرة **تسامحنى على انى مش شفتها
*******************

حزب بلا مقر لكن لنا اهداف معروفة ومحددة
رضا الله وخدمة المجتمع
يعنى احنا احسن وانجح حزب موجود فى مصر
الشباب الابطال بجد
بابا أبو خالد ***أستاذ شريف
أ/ احمد كمال
* ضياء * محمد وايت هارت * سووو *
ميدو فى الادغال * الباحث عن الحقيقة جننى * ابن حجر العسقلانى انا جننته :)
الغزالى * طارق كوارث * عبد الرحمن فارس * احمد شاهين *الصباغ صحفى المدونين
خالد همس الاحباب اللى دايما يوصلنا *احمد سكر عربيتة مستحمليتش فى الصيام *
صباح الصباح اللى بعتذر له جدااا والله على تقصيرى معه :$
عبد الرحمن مواطن صيدلى مطحون * قلب مصرى وهو فعلا كدة قلب مصرى كبير
محمد عطية الشاعر * محمد يوسف *محمد حسام * محمد مدحت :( مش شفت الناس دى
وطبعا فى اسماء تانية بعتذر جداا عن انى نسيتهم بس والله انا اصلا ناسية نفسى فحقكم على
شكر خاص جدااا
لاحمد ك صاحب مدونة دردشة عربى
لانة رغم عدم تواجدة الا انه شارك وارسل هدايا للاطفال وسكر استلهما جزاهما الله خيراا
داليا ** أهوا دا عيبة ودعاء** ربع ضارب اصروا انهم يرسلوا معى ادوية للاطفال
بارك الله فيهم


فى الاخر تقبل الله منا ومنكم صالح الاعمال
وجعل العمل خالص لوجهه الكريم

تعاونوا على البر

تحديث
يا جماعه اللى هيتبرع بفلوس يقسم المبلغ الى مبالغ بسيطة
ويحطها فى اظرف عشان يقدر يدى لاكبر عدد من الاطفال
وتقبل الله منكم صالح الاعمال
يوم السبت هنتقابل عشان نحاول نوفر ادوية لبعض الاطفال المرضى

فى مستشفى ابو الريش

دى بعض الادوية اللى الاطفال محتاجنها

اللى يقدر يجبها ويرسلها

او يسلمها بنفسة يبقى جزاه الله خيرا



ابو الريش يارب يعيشوا
اسماء الدوا اللى هيحتاجوه
L .Ecarintin cap------------------22
L.Evental inhcler------------------8.5
ESodium bicarbonate------------- 4 L.E
Rimactan syrup ---------------------6.5 L.E
inderal amp ----------------------- 38 L.E
Nor adrenaline ------------------ 60 L.E
( علبة بها 100 أمبول)diflucan vial --------------------- 67.5 L.E
meronem 1/2gm or 1gm 80l.e 116L.E


دا ميل قوس قزح اللى عمله الحملة




ودا ميل ابــــــى

اللى عندها استعداد تقابل اى حد وتاخد منه الدواء

حتى لو كمان بعد يوم السبت




تعالوا نتعاون على البر

ونحاول نمد ايد الامل للأطفال المرضى



اذكرك بقول النبى صلى الله عليه وسلم

عَن النُّعْمَانِ بْنِ بَشِيرٍ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ

: ( مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ مَثَلُ الْجَسَدِ؛ إِذَا اشْتَكَى مِنْهُ عُضْوٌ تَدَاعَى لَهُ سَائِرُ الْجَسَدِ بِالسَّهَرِ وَالْحُمَّى:)
يارب نحاول نعدد النية عشان ربنا يكتب لنا الاجر
ان شاء الله
1:- زيارة المريض
2:- ادخال السرور على قلب مسلم
3:- شكر الله على نعمه الصحة
4:- التعاون على البر
5:-تفريج الكرب
6:- مساعد المحتاج
تقبل الله منا ومنكم صالح الاعمال وجعلها خالصة لوجهه الكريم

تانى مشهد

تحديث

مبروك عليك يا حكومة ورمضان كريم

اكثر من 43 اسرة فيها موتى 57 اسرة فيها ريحة الموت فى شهر الخير

اقول اية حسبى الله ونعم الوكيل فى الحكومة وفى رجال الاعمال اللى جايينا ورا

وفى الاهمال حسبى الله ونعم الوكيل

ابى نشرة موضوع ومحاولة للمساعدة من اهلى القاهرة

التحديث دا بلون دم ابناء الدويقة


تحديث هام جداا
ان شاء الله يوم السبت الموافق 13/9
هيكون فى تجمع للتبرع فى مستشفى ابو الريش للاطفال
بناء على اقتراح
قوس قزح
اتمنى انى اشوفكم هناك
تعالوا نحاول نرسم بسمه ونطهر ذنب
وبعدين هيكون فى افطار جماعى







أنا :ـ كل سنة وانتى طيبة

هى : وانتى طيبة

أنا:ـ تعالى نروح نصلى التراويح

هى :ـ انتى بتصلى فين ؟؟

أنا:ـ فى المسجد اللى جنب البيت

هى:ـ لا تعالى نروح مسجد شيك

أنا :ـ شيك اية يابنتى ما كل المساجد شيك والحمد لله

هى :ـ لا طبعا تعالى نروح مسجد يكون فى ارقى مكان فى البلد

أنا:ـ !!! ودى تفرق كلها مساجد هو احنا هنتزوجة ولا اية

هى :ـ لا وانتى الصادقة هنتزوج منه

أنا:ـ !! نتزوج منه ــــ هى صلاة تراويح ــ ولا حفل تعارف ؟؟ الصيام عامل عاميلة

معاكى على الاخر ربنا يلطف بيك من اول يومين وهيستى

هى:ـ انتى اللى مخك تخين انتى مش عايشة فى الدنيا ولا اية انتى مش عارفة

ان البنات بيروح المساجد عشان يتزوجوا ولا اية

أنا :ـ انا كنت فاكرة بيروحوا عشان يصلوا !! طلع كل واحد يطلى على ليلاة أأقصد يغنى

هى:ـ المهم طنط هتجى وياكى ولا انتى لوحدك ؟؟

أنا :ـ مش عارفة لية هى كمان لها بروتكول خاص ولا فى عرسان فى سنها ؟؟

هى :ـ لا يابنتى اصل مامتك دى صورتك لما تبقى فى سنها يعنى لازم تكون ست شيك

وهادية وطيوبة وكمان اجتماعيه عشان تتعرف على الامهات التانين

أنا :ـ هى ها تتعرف ولا هتصلى

هى:ـ انتى مخك تخين كدة لية ؟ اسمعى وانتى ساكتة

أنا:ـ طيب خلاص قولى

هى :ـ طنط دى هى اللى هتفتح لنا الباب هتعرف مين من الامهات عندنا شباب

فى سن مناسب وبعدين احنا نقوم محددين الهدف ونحاول بقى نلفت نظر ام العريس لينا

ونكسب رضاها وحبها

أنا :ـ يا سلام كل دا ؟! وادا ازاى بقى ان شاء الله ؟؟

هى :ـ يعنى نساعد الست وهى بتقوم او بتجلس نجيب لها تشرب وياسلام لو مش مية

أنا:ـ اجيب السبرتاية معايا بالمرة اهى تنفع !!!

هى :ـ انتى بتترئى ؟! الحق على

أنا :ـ يابنتى انا كنت فاكرة الموضوع صلى وخشوع والسلام عليكم

هى :ـ محنا هنصلى بس مفيش مانع اننا كمان ننتهز الفرصة ونحاول نتعرف على كم طنط

واللى مش عندها اولاد عندها ولاد اخت ولا اخ ولا حتى جار

أنا :ـ انا حاسة انى بشوف فيلم عربى هابط

هى :ـ لا ياحبيبتى هى دى الموضة الوقت زواج المساجد مش بتشوفى العريس يقولك عايزها بتصلى

وحافظة قران طيب هيعرف ازاى بقى الامن امه اللى بتشوفها فى المسجد !!!

أنا :ـ ياسلام 000 ربنا يستر ومكنيش اخره الصلاة على النبى صلى الله عليه وسلم

هى :ـ اثبت لك انتى لما بتخرجى من المسجد بعد الصلاة مش بيكون فى شباب واقفين على باب المسجد

أنا :ـ اهى ياختى وبحس انه بيدور فى وشى على حاجة ضايعه منه أنف سنة مكسورة منه نطت فى خلقتى

حاجة بصراحة تكسف انا بحط وشى فى الارض وامشى بسرعه

هى :ـ عبيطة انتى كان المفروض تبصى له بصة كدة فيها خجل وانوثة وكأنك بتقولى له تعالى ؟؟

أنا :ـ تعالى فين ؟؟يادى المصيبة :( كل دا فى البصة ازاى دا؟؟؟

هى :ـ تعالى بيتنا يكون تعالى فين !!! كمان يا نيلة انتى هو بيبص سبيه يبص وابتسمى حسسية انك مرحبة بيه

وانه هو دا اللى بتتمنية

أنا :ـ لا ياختى شكرااااااااا انا مش بعرف اعمل الافلام دى كمان هو الاخ اللى لسة خارج من الصلاة

مش المفروض يغض بصرة ؟؟ ومش المفروض انه مايتنحش كدة فى وش البنات ..؟؟

هى :ـ اوف بقى انتى زهقتينى انا هروح اصلى فى مسجد الشاطئ00 هتجى معايا ولا هتصلى فى المسجد اللى جنب بيتكم
أنا :ـ لالالا انا هصلى فى بيتنا مش هروح مساجد خلاص شكرااا

مشاهد رمضانية

كل سنة وانتم طيبين ورمضان كريم علينا وعليكم ان شاء الله

******************

عجبنى اوى اعلان مجموعه شركات طلعت مصطفى وشعرت

بالفخر وبمدى المصداقية اللى فى كلمات الاعلان مع مبادئ صاحب الشركة 00 الله يعطيه الصحة

الله يرحم سوزان تميم

*****************************

ابتدى اسوء ما فى رمضان

واللى بيكرهنى فى نفسى كمان البومب والصواريخ

ابقى ماشية فى الشارع لا بيا ولا على القى الصاروخ تحت رجلى وانا مش شيافة اسمع صوتة

تخيلوا يعنى هعمل اية :( لا واية الشباب يضحكوا على وكانى من عالم اخر طيب يعنى هو لو مكانى

كان هيعمل اية؟؟

******************

لفت نظرى محاولة الناس زى كل سنة انهم يرشدوا فى المصاريف بالذات مصاريف الاكل

بالذات البورسعيدية مبدعين جداا فى الموضوع دااا بشكل يفوق الوصف

*********************

منظر الفوانيس جميل ومحبب الى قلبى لكن لما بقرب

واشوف كلمة صنع فى الصين نفسى بتتسد

*******************

حلو اوى النهم على اصلاح المظهر الخارجى بالذات للنساء بأقبلاهم على شراء العبايات

بس المشكلة انها ضيقة جداا ويا حرام بحس انهاا هتتفرتك عليهم من كتر ماهى ضيقة

*************

وأبتدى سباق المسلسلات

وربنا يستر ونتذكر جزء مما عاهدنا الله عليه فى شهر رمضان

*******************************

قلت اروح اصلى وفى اول صلاة فجر لى

اخطاء للامام ( كلنا بنغلط يا بنت انتى 00 يعنى انتى خلاص ام العريف )

**************

واخطاء النساء مالهاش حل ابداا

بداية لابس ملابس ملفتة سبحان الله كل النساء عندنا مقياس ملابسهم زى نانسى عجرم

حتى وان كانواا فى حجم الافيال ههههههههههه

حلو اوى ان الواحد يكون فى الصف الاول لكن من غير لمس الاكتاف الغير قانونى

ولا ضرب الكوع من تحت الخصر بخفة ورشاقة وقوة

تدفع الخصم أأأقصد المصلى الى الصف الخلفى

***********************

النساء اللى ربنا يديهم الصحة ومش قادرين يقفوا يصلوا جايبين كراسى وقاسمين الصف الاول اللى للاسف لم يكتمل ابدا

عشان يصلوا فى اول صف

**************************

وما ان انتهت الصلاة الا وبدأنا ولله الحمد فى سباق مارثون 100متر للتنافس !!! مين يخرج الاول

وكان معكم نهر الحب من مصلى النساء

ولا حول ولا قوة الا بالله