بحث هذه المدونة الإلكترونية

تانى مشهد

تحديث

مبروك عليك يا حكومة ورمضان كريم

اكثر من 43 اسرة فيها موتى 57 اسرة فيها ريحة الموت فى شهر الخير

اقول اية حسبى الله ونعم الوكيل فى الحكومة وفى رجال الاعمال اللى جايينا ورا

وفى الاهمال حسبى الله ونعم الوكيل

ابى نشرة موضوع ومحاولة للمساعدة من اهلى القاهرة

التحديث دا بلون دم ابناء الدويقة


تحديث هام جداا
ان شاء الله يوم السبت الموافق 13/9
هيكون فى تجمع للتبرع فى مستشفى ابو الريش للاطفال
بناء على اقتراح
قوس قزح
اتمنى انى اشوفكم هناك
تعالوا نحاول نرسم بسمه ونطهر ذنب
وبعدين هيكون فى افطار جماعى







أنا :ـ كل سنة وانتى طيبة

هى : وانتى طيبة

أنا:ـ تعالى نروح نصلى التراويح

هى :ـ انتى بتصلى فين ؟؟

أنا:ـ فى المسجد اللى جنب البيت

هى:ـ لا تعالى نروح مسجد شيك

أنا :ـ شيك اية يابنتى ما كل المساجد شيك والحمد لله

هى :ـ لا طبعا تعالى نروح مسجد يكون فى ارقى مكان فى البلد

أنا:ـ !!! ودى تفرق كلها مساجد هو احنا هنتزوجة ولا اية

هى :ـ لا وانتى الصادقة هنتزوج منه

أنا:ـ !! نتزوج منه ــــ هى صلاة تراويح ــ ولا حفل تعارف ؟؟ الصيام عامل عاميلة

معاكى على الاخر ربنا يلطف بيك من اول يومين وهيستى

هى:ـ انتى اللى مخك تخين انتى مش عايشة فى الدنيا ولا اية انتى مش عارفة

ان البنات بيروح المساجد عشان يتزوجوا ولا اية

أنا :ـ انا كنت فاكرة بيروحوا عشان يصلوا !! طلع كل واحد يطلى على ليلاة أأقصد يغنى

هى:ـ المهم طنط هتجى وياكى ولا انتى لوحدك ؟؟

أنا :ـ مش عارفة لية هى كمان لها بروتكول خاص ولا فى عرسان فى سنها ؟؟

هى :ـ لا يابنتى اصل مامتك دى صورتك لما تبقى فى سنها يعنى لازم تكون ست شيك

وهادية وطيوبة وكمان اجتماعيه عشان تتعرف على الامهات التانين

أنا :ـ هى ها تتعرف ولا هتصلى

هى:ـ انتى مخك تخين كدة لية ؟ اسمعى وانتى ساكتة

أنا:ـ طيب خلاص قولى

هى :ـ طنط دى هى اللى هتفتح لنا الباب هتعرف مين من الامهات عندنا شباب

فى سن مناسب وبعدين احنا نقوم محددين الهدف ونحاول بقى نلفت نظر ام العريس لينا

ونكسب رضاها وحبها

أنا :ـ يا سلام كل دا ؟! وادا ازاى بقى ان شاء الله ؟؟

هى :ـ يعنى نساعد الست وهى بتقوم او بتجلس نجيب لها تشرب وياسلام لو مش مية

أنا:ـ اجيب السبرتاية معايا بالمرة اهى تنفع !!!

هى :ـ انتى بتترئى ؟! الحق على

أنا :ـ يابنتى انا كنت فاكرة الموضوع صلى وخشوع والسلام عليكم

هى :ـ محنا هنصلى بس مفيش مانع اننا كمان ننتهز الفرصة ونحاول نتعرف على كم طنط

واللى مش عندها اولاد عندها ولاد اخت ولا اخ ولا حتى جار

أنا :ـ انا حاسة انى بشوف فيلم عربى هابط

هى :ـ لا ياحبيبتى هى دى الموضة الوقت زواج المساجد مش بتشوفى العريس يقولك عايزها بتصلى

وحافظة قران طيب هيعرف ازاى بقى الامن امه اللى بتشوفها فى المسجد !!!

أنا :ـ ياسلام 000 ربنا يستر ومكنيش اخره الصلاة على النبى صلى الله عليه وسلم

هى :ـ اثبت لك انتى لما بتخرجى من المسجد بعد الصلاة مش بيكون فى شباب واقفين على باب المسجد

أنا :ـ اهى ياختى وبحس انه بيدور فى وشى على حاجة ضايعه منه أنف سنة مكسورة منه نطت فى خلقتى

حاجة بصراحة تكسف انا بحط وشى فى الارض وامشى بسرعه

هى :ـ عبيطة انتى كان المفروض تبصى له بصة كدة فيها خجل وانوثة وكأنك بتقولى له تعالى ؟؟

أنا :ـ تعالى فين ؟؟يادى المصيبة :( كل دا فى البصة ازاى دا؟؟؟

هى :ـ تعالى بيتنا يكون تعالى فين !!! كمان يا نيلة انتى هو بيبص سبيه يبص وابتسمى حسسية انك مرحبة بيه

وانه هو دا اللى بتتمنية

أنا :ـ لا ياختى شكرااااااااا انا مش بعرف اعمل الافلام دى كمان هو الاخ اللى لسة خارج من الصلاة

مش المفروض يغض بصرة ؟؟ ومش المفروض انه مايتنحش كدة فى وش البنات ..؟؟

هى :ـ اوف بقى انتى زهقتينى انا هروح اصلى فى مسجد الشاطئ00 هتجى معايا ولا هتصلى فى المسجد اللى جنب بيتكم
أنا :ـ لالالا انا هصلى فى بيتنا مش هروح مساجد خلاص شكرااا

160 التعليقات:

  علي محـمــــــد

الخميس سبتمبر 04, 06:58:00 م 2008

ألسلام عليكم

ههههههههههههههه انصحك ما تمشيش مع البنت دي .. مع ان الاسلوب والحوار صريح ولا يمكن اني اسمعه بهذا الشكل الا من بنت عاشت هذا الحوار 0- إلا إني اتوقع وجود افكار مثل افكار صديقتك هذي - اعتقد صاحبة فكره زي هذي مستحيل تنجح - والسبب ببساطه انها اعتمدت الرياء في الدين لتحقيق اهدافها واحلامها - انا مش ضد الفكره من الاساس - لكن الوضوح في الحوار بهذا الشكل وشرطها في اختيار المسجد ان يكون في منطقه راقيه غير مقبول في تحقيق حلمها المشروع - وعلى فكره احب اوضح شيء مهم بعض البنات يعتقدون ان الشباب ممكن يتضحك عليهم بسهوله وهذا غير صحيح - لان الانسانه اللي بتفكر بهذا الشكل مثل صديقتك لايمكن ان تمثل طول حياتها نفس الدور - وغالباً اذا كان الطرف الثاني ذكي اكيد اكيد حيكتشف طريقتها بسهوله :) .. بصراحه حوار رااائع مع اني لاأؤيد ما جاء فيه .. اشكرك على كشف المستور :)

Saudi Romantic سابقاً
في امان الله

  Unknown

الخميس سبتمبر 04, 07:14:00 م 2008

على محمد
اهلا بك اولا هو الموضوع فعلا حقيقى بس انا عملت له حوار اطول شوية لكن الفكرة فعلا موجودة
وزى ما انت قلت لا رياء فى الدين
جميل جدا مرورك واهلا بك
نورت مصر
كل عام وانت بخير

  أمل حمدي

الخميس سبتمبر 04, 08:17:00 م 2008

بوست جميل يانهرالحب

كلام واقعي فعلا وبيحصل

ربنا يحفظ بنات المسلمين ويهديهم يارب

انا فرحت انك من بورسعيد

كل عام وانت بخير

  Unknown

الخميس سبتمبر 04, 08:21:00 م 2008

السلام عليكم

خليكي علي مبادئك يا نهر الحب
روحي صلي وتعاملي بفطرتك الطيبه ولا كأنك سمعتيها

صلي في اقرب مسجد
ساعدي كل الناس
متنتظريش مقابل
متصطنعيش تصرفات يعني متحاوليش تثبتي لحد نك البنوته المثاليه
كوني نفسك

واكيد اللي مش بيحط الناس في دماغه ربنا بيكرمه


ربنا يكرمك ويهدي صحباتك


تحياتي

  شهرزاد

الخميس سبتمبر 04, 08:24:00 م 2008

نهر الحب
كل سنة وانت بالف خير
حوار جميل وليس ببعيد عن الواقع
فنحن في زمن قد تشوهت فيه المبادىء وتغيرت فيه المفاهيم وأصبحنا نفكر في مصالحنا قبل كل شيء
وإنما الاعمال بالنيات
ولا حول ولاقوة إلا بالله

تحياتي لك

  Unknown

الخميس سبتمبر 04, 08:32:00 م 2008

ماما امولة
اهلا بك وكل عام وانتى بخير
انا كمان فرحت بحضرتك جداا
رمضان كريم

  Unknown

الخميس سبتمبر 04, 08:33:00 م 2008

بركش
ازيك كل عام وانت بخير
يا بكرش انا بتكلم للاسف عن واقع مرير
والكلام دا بجد بيحصل
شكرا لك

  Unknown

الخميس سبتمبر 04, 08:34:00 م 2008

شهر زاد
اهلا بك وكل عام وانتى بخير
فعلا والله يا شهرزاد الكلام دا موجود
بس انا حاولت اسلط عليه الضوء

  yoyo

الخميس سبتمبر 04, 08:36:00 م 2008

كل سنة وانت طيبة

رمضان كريم

عزيزتى الحوار اللى حصل دا للاسف متواجد على ارض الواقع
مع انه شهر العبادة والتقرب الى الله بقى ولو موسم الاستعداد بقى والشاطرة اللى تعرف تصطاد عريس احسن

بس هى تبقى دى صلاة وتقرب الى الله ازاى و فى هدف فى دماغك والصلاة دى استغفر الله مجرد وسيلة عشان تتعرفى على مش عارفة طنط فلانة وعمتو علانة

والله والله اللى رايحين النادى ولا حتى الكافيه بجد سلوكيات فى منتهى الاسف مش بقينا بنعرف نعمل الشىء الصح
ربنا يرحمنا يارب ويستر علينا

عزيزتى تسلمى وتسلم ايدك على اثارة الموضوع الجرىء دا
دمتى بكل خير
تحياتى
يويو

  salwa

الخميس سبتمبر 04, 09:12:00 م 2008

السلام عليكم نهر الحب
شر البلية ما يضحك,
حتى الصلاة في الجامع اصبح فيها ان؟!!
سلمت يدك,ادراج رائع كما تعودناك
رمضان كريم و صيام مقبول ان شاء الله
لكي مودتي
جمعتك مباركة ان شاء الله
سلام

  Unknown

الخميس سبتمبر 04, 10:02:00 م 2008

السلام عليكم ورحمة الله وبركاته
للاسف الشديد
صديقتك من
ستتزوج اولا
هذا توقعى
مما اراه انا
فى حياتنا
اليومية
الواقعية

  ابن حـجـر الـعـسـقـلانـى

الخميس سبتمبر 04, 10:58:00 م 2008

عايزة الصراحة ؟؟ التدوينة رائعة جدا و مليانة حاجات كتير ممكن نتكلم فيها

بس أنا ممكن يكون ليا وجهة نظر مختلفة شوية .. تعالى نتفق أولا على شوية نقط

ا- سن الزواج عند البنات ارتفع
ب- ماحدش من الشباب بيعرف يكون نفسه بسهولة و يتزوج
ج- نسبة العنوسة زايدة
د- البنات عندهن رغبة طبيعية فى الزواج و الارتباط
هـ- البنات نفسها تتزوج واحد عنده أخلاق و دين

كل دى حقايق ما نختلفش عليها

فلو بصينا على سلوكيات صاحبتك هانلاقى فيها حاجات ممكن تكون مقبولة و حاجات تانية مرفوضة

الحاجات المقبولة زى
ا- مش عيب إن البنت يبقى عايزة تتجوز .. و لما حبت تقوم بعمل إيجابى .. لجأت للمسجد
ب- البنت حاولت تتعرف على سيدات فى المسجد .. ثم إن السيدات نفسهم بيحاولوا يشوفوا بنت مناسبة لأبناءهم .. فلا مانع إن البنت تستغل موقف زى دة فى شىء مشروع و هو الزواج .. هو مش الولد الراغب فى الزواج من أجل التعفف ربنا بعينه .. كذلك البنت الراغبة فى الزواج من أجل التعفف ربنا بيعينها
ج- كويس لو البنت كانت مش بتصلى .. و بعد كدة بدأت تصلى و تعرف طريق المسجد استجابة لشروط الشباب فى الزوجة
د- المسجد المفروض يكون ليه دور كبير فى حياة المسلمين .. يعنى المفروض إنه مايكونش لمجرد إقامة الصلاة فقط .. المفروض إنه يكون مؤسسة اجتماعية كبيرة

الحاجات الغير مقبولة زى
ا- تبادل النظرات مع الشباب خارج المسجد
ب- الزينة المبالغ فيها
ج- إن الذهاب للمسجد يكون بهدف الحصول على زوج فقط و مايكونش فيه أى نية لإقامة الصلاة فى المسجد .. لكن لو جمعت ما بين النيتين (إقامة الصلاة و الرغبة فى الزواج) فلا شىء فى ذلك

أنا معاكى إن لجوء البنت لمثل هذا الفعل بيوحى للآخرين إن مقدار حياءها مش كبير .. و قد يكون فيه بعض الجرأة .. لكن لازم نراعى الدوافع الإنسانية فى تقييم سلوكها .. و هى دوافع مشروعة

يعنى لو تكاليف الزواج كانت قليلة .. و الحالة الأخلاقية الشائعة فى البلد كانت راقية .. كانت البنت هاتقعد فى بيتها معززة مكرمة و يجيلها الزوج المناسب .. لكن الحالة مش كدة للأسف .. فالبنت لجأت إنها بدل ما تقعد ساكتة ... قررت تتحرك

فى النهاية أنا رأيى لو كنا بالفعل هانوجه لوم لحد ..فاللوم يتوجه للبلد إللى الظروف فيها بقت صعبة جدا

  ابن حـجـر الـعـسـقـلانـى

الخميس سبتمبر 04, 10:59:00 م 2008

معلش نسيت أقول .. إن بصراحة الموضوع رائع ... و الحوار معبر جدا عن حاجات كتير قوى

بجد تحياتى على الموضوع

  حسن حنفى

الخميس سبتمبر 04, 11:01:00 م 2008

السلام عليكم

ههههههههه

والله فعلا معاكي حق فيه ناس كتير بتروح المسجد وهي مش عاوزه تصلي اساسا

والله انا اعرف ناس للاسف بيروحوا المسجد علشان يعاكسوا او بنات عاوزهتتعاكس

سبحان الله حتي المسجد

  EMMY BABY

الخميس سبتمبر 04, 11:02:00 م 2008

هههههههههههههههههههههههههههه

والله انا شفت الحوار ده كتير بس بصراحة مكنش فى المسجد

بس انا والله بستغرب اوى الحاجات دى وتصدقى الاول مكنتش بصدقها طلعت صح

اصلا البنت جمالها فى حياءها وشخصيتها مش هى اللى هترووح تدور على العريس

هو هيجى طول ماهى ادب واخلاق

ربنا يهدى يارب

تحياتى

ايمى

  Unknown

الخميس سبتمبر 04, 11:08:00 م 2008

السلام عليكم
بوستك حلو اوي وعلي فكره بتحصل الحكايه دي كتير اليومين دول مش قصدي في الجوامع انما عامه يعني
وبلوجاتك كلها لذيذه اوي علي فكره
تسلم ايدك
ورمضان كريم
وكل سنه وانتي طيبه=)

  باجوجو

الخميس سبتمبر 04, 11:31:00 م 2008

أنا عجبنى جدا أسلوب الحوار دا
وبالنسبة للموضوع
فأنا فرحت جدا أما قلتى فى الآخر
أنا هصلى ف البيت مش فى مساجد خالص
وكان هذا أسلم الحلول
بس أنا بصراحة أول مرة أعرف إن فى ناس بالتفكير دا
اللهم رد شباب المسلمين إلي دينك مردا جميلا
تقبلى تحياتى

  Unknown

الجمعة سبتمبر 05, 12:32:00 ص 2008

يويو
الحمد لله ان الموضوع عجبك
وهو فعلا موضوع موجود فى ارض الواقع
ربنا يعافنا
كل التحية والاحترام لك
كل عام وانتى بخير

  Unknown

الجمعة سبتمبر 05, 12:33:00 ص 2008

سلوى
اهلا بك كل عام وانتى بخير
يارب يجعل اعمالنا خالصة لاجل وجهه الكريم
تحياتى لك

  Unknown

الجمعة سبتمبر 05, 12:34:00 ص 2008

norahaty
والله ما تفرق معى من يتزوج الاول او حتى لا يتزوج
انا المهم عندى تقوى الله بجد
والزواج يكون على اساس صح
تحياتى

  عايش... ولكن !!!!

الجمعة سبتمبر 05, 12:40:00 ص 2008

لا دى البت طلعت صرحه اوى
ههههههه قوليلى بتصلوا فين علشان اجى اشوف يمكن حد يعجبنى ههههههههه
والله حاجه حلوه اوى
ربنا يعافينا يارب
ولسه ياما هنشوف
انما هو الكلام فى الاخر لما كبرتيه دخل فى بعضه ولا انا عندى انا بس؟!!!
دمتى موفقه
علاء

  Unknown

الجمعة سبتمبر 05, 12:40:00 ص 2008

ابن حجر العسقلانى
اهلا بك
بص ارد على نقطة نقطة
كل ما ذكرت انت عن ظروف الزواج فى بلدنا صحيحة ولا خلاف عليها
لم اقل ابدا ان الرغبة سواء للبنت او الرجل للبناء عيب ابدا هو طلب مشوع جدا وهو سعى للعفة ودا ابسط حقوق الانسان ان يستقر نفسيا وجسديا مع نصفة الاخر
ولم انتقد سعيها بقدر انتقادى لمحاولة التلون والتغيرر الشكلى لا الفعلى للحصول على زوج وكأنة سعى دؤؤب للوقوع بفريسة
دون النظر ان كان فعلا هذا الشخص مناسب ام لا او انه فعلا كما يبدوا ام انها مجرد قشرة
تحياتى لابن حجر
شرفنى جدا مرورك

  Unknown

الجمعة سبتمبر 05, 12:41:00 ص 2008

حسن حنفى
للاسف احنا نحول اشياءنا وعبادتنا الجميلة الى عادات قبيحة

كل عام وانت بخير

  Unknown

الجمعة سبتمبر 05, 12:43:00 ص 2008

ايمى ازيك
والله يا ايمى دا للاسف واقع مرير ومبتذل نعيشة
تحياتى لك

  د. مونى

الجمعة سبتمبر 05, 12:45:00 ص 2008

ههههههههه
تصدقى فعلا ان الحكاية دى بقت منتشرة بشكل كبير بين البنات؟
بس بصراحة هى موجودة بشكل ضمنى محدش بيتكلم فيها صراحة كده.. كمان كنا بنشوف الاهتمام بالاساليب دى من الامهات والخالات وكده يعنى
افراح ... نوادى... اى مكان فيه تجمعات
لكن ايه هوس البنات بطرق البجث عن زوج دى؟؟؟
بجد بوست رائع واسلوبك فى السرد ممتع
تحياتى ليكى

  Unknown

الجمعة سبتمبر 05, 12:46:00 ص 2008

Little Lady
شكرا لك على اطرائك
والحمد لله ان مدونتك عجبتك
وان شاء الله مزيد من التواصل

  Unknown

الجمعة سبتمبر 05, 12:49:00 ص 2008

باجوجو
والله الظروف اجبرت الناس على تصرفات كتير مش صح بالاضافة الى الامية الدينية
ومحاولة العفة

تحياتى

  طلاب من أجل مصر

الجمعة سبتمبر 05, 12:52:00 ص 2008

ههههههههههههههههههههه
والله انا في الاول استغربت جداا على الحوار
بس هوه موجود بس في شخصيات معينه غريبة الاطوار ..وقلك الصراحه الشباب اكتر من البنات
لان البنت بطبعها الخجل
وصعببه والله اني ارده النظرة دي ..دي بقه اصلا تبقى مش محترمه ولا عندها دم ولا خجل ..اللي هيا بتقول عليه

ربنااا يعفينااا
احنااا في زمن العجااائب والله
عجب عجب بنشوفه في الزمن ده

البنات بيعكسوا الشباب ..و..وحجاات تشييب والله
ربنايحفظنا
زمن الماسك فيه على دينة كالماسك على الجمر

وربنا يتقبل منا الصيام والقيام

موضوع غرييييب بس جميييل والله
الف شكر
تحياتى

  Unknown

الجمعة سبتمبر 05, 12:54:00 ص 2008

عايش ولكن
بصراحة انا هصلى فى البيت لكن
انت ممكن تلاقى الفكرة دى منتشرة فى منطقتك ايضا
اللهم اجعل اعمالنا خالصة لوجهك الكريم

  Unknown

الجمعة سبتمبر 05, 12:56:00 ص 2008

د/ مونى
الحمد لله انه عجبك اسلوب السرد او التناول وربنا يقدرنا ونحاول نغير فكر خاطئ ومستغل لعبادة مهمة فى شئ تانى


تحياتى لك

  Unknown

الجمعة سبتمبر 05, 01:23:00 ص 2008

عبد الهادى _ سارة
اهلا بك والله هو قلة الحياة كموضوع
او كظاهرة يعانى منها الشباب والبنات على حد سواء ودا راجع للانفتاح الفكرى غلى الغرب ومحاولة التشبة بهم
ودا طبعا مصيبة ومشكلة كبيرة
تحياتى لك

  تايه في وسط البلد

الجمعة سبتمبر 05, 01:39:00 ص 2008

في بعض الاحيان اتمني من الله ان يخيب ظني!!
ودوما ما يغافلني عقلي فينطلق في التفكير واعمال المنطق الي ان افاجأ باني قد وصلت الي قناعة لم اكن احب ان اصل اليها لانها ستغير نظرتي في بعض البشر
حوارك كان ظريفا جدا

وللاسف حقيقيا جدا

الف تحية

  تايه في وسط البلد

الجمعة سبتمبر 05, 01:39:00 ص 2008

في بعض الاحيان اتمني من الله ان يخيب ظني!!
ودوما ما يغافلني عقلي فينطلق في التفكير واعمال المنطق الي ان افاجأ باني قد وصلت الي قناعة لم اكن احب ان اصل اليها لانها ستغير نظرتي في بعض البشر
حوارك كان ظريفا جدا

وللاسف حقيقيا جدا

الف تحية

  Mona Shereif

الجمعة سبتمبر 05, 01:48:00 ص 2008

هههههههههههههههههههههههههههههههههه
ربنا يفرح قلبك يارب ويسعدك
جميل اوى البوست والمشاهد بتاعة رمضان
ده بقى العادى يا بنتى

عارفه اسمك جميل اوى ربنا يبارك فيكى

ربنا يرزقك انتى وكل بنات المسلمين بالازواج الصالحين يارب العالمين وبالطريقه اللى تحبيها وتكونى مقتنعه بيها

معلش انا عارفه ان الحوار ده يضايق بس كويس انه حصل علشان تحكيه لنا وتفرحى قلوبنا كده

ربنا يوفقك الى ما يحبه ويرضاه اللهم امين
كل سنة وانتى طيبه

  shimaa

الجمعة سبتمبر 05, 01:54:00 ص 2008

اول مرة ازور مدونتك لكن عجبنى اوى البوست ده
وهو فى حاجات بجد
انا بلاقى فى المسجد امهات كتير بيدورا على عرايس لأولادهم
بيشوفوا ان المسجد مكان آمن لاختيار عروسة بس اهم حاجة متكونش اللى رايحة تصلى رايحة علشان تتجوز

لن تكون أخر زيارة لى بعالمك
شرفت بمعرفتك

  Unknown

الجمعة سبتمبر 05, 02:03:00 ص 2008

تاية فى وسط البلد
والله الموضوع له جانب ايجابى
لكن الجانب السلبى اكبر واخطر
وهذا ما احاول الضغط عليه لابرازة
تحياتى لك
وكل عام وانت بخير

  Unknown

الجمعة سبتمبر 05, 02:05:00 ص 2008

Sometimes
اهلا بك
وشاكرة جدا مدحك لاسمى فانا احب الاسم دا جداا
كل الشكر لك على المرور
رمضان كريم

  Unknown

الجمعة سبتمبر 05, 02:07:00 ص 2008

شيماء طلعت
اهلا بك وشاكرة زيارتك لى
فعلا دا حقيقى المهم النية وثوابت الفكر

كل التحية وتشرفى اى وقت

تحياتى

  Asmaa mahaba

الجمعة سبتمبر 05, 02:17:00 ص 2008

يا بنتى المرائيين زادوا جداا ولعلمك عندنا بنات كتير اتخطبوا بالمنظر دا باللوع والكدب والتمثيل
والمشكله انك تبقى عارفه حقيقه اللى قدامك وايدك متكتفه عن الكلام وتوضيح الخداع اللى بيحصل وهاتى ايدك يا طنط وحاسبى يا طنط وسلامتك يا طنط
بس على مين دا ربك سبحانه وتعالى بيدى كل واحد على اد نيته
افضل شىء بقى الناس لازم تعرفه
هو اجرى يا ابن ادم جرى الوحوش غير رزقك لم تحوش
كسبوا خطوبه ورجال وكسبوا سيئات واحتسبوا من المرائين
تحياتى ليكى سومه_87

  الدرعمي

الجمعة سبتمبر 05, 02:18:00 ص 2008

السلام عليكم

كل سنة وأنت ِ طيبة يا طنط

ورمضان كريم


آدم

  Asmaa mahaba

الجمعة سبتمبر 05, 02:19:00 ص 2008

نسيت اقولك ان كمان اللى زود الظاهره دى ان رجالتنا فى العالم العربى بياخدوا بالمظاهر مما يسهل على البنت انها تسك الراجل على قفاه ويتخم فيها بعد كدا يقول يا ريت اللى جرى ما كان
لو بصوا للامور بتفاعل وعدم سطحيه وعمق اكتر ووثقوا فى البنت الصريحه وكان عندهم امكانيه التاثير فى الاخرين حيعرف ازاى يختار صح مش يخد بمبه

  Asmaa mahaba

الجمعة سبتمبر 05, 02:22:00 ص 2008

نسيت اقولك شىء مهم لازم يفهمه الجميع الغايه لا تبرر الوسيله

  Unknown

الجمعة سبتمبر 05, 02:40:00 ص 2008

سومة
طيب اقولك اية سلم لسانك
:)
سبحان الله ناس بتاخد بالمظاهر
تحياتى لحبيبة قلبى سومة

حاولت ادخل مدونتك واعلق ومفيش فايدة ابداا

رمضان كريم

  Unknown

الجمعة سبتمبر 05, 02:41:00 ص 2008

ادم
ازيك
كل عام وانت بخير

رمضان كريم

  Unknown

الجمعة سبتمبر 05, 02:42:00 ص 2008

سومة
انتى بتتكلمى بالسانى
والله بس اقول اية هم حابين اوى الغش والتدليس ودايما سيد الموقف هو المظهر لا الجوهر
سومة بجد نورتينى

  Unknown

الجمعة سبتمبر 05, 02:43:00 ص 2008

سومة
وانا نسيت اقولك
ان نتيجة الزيجة المستهلكة من البداية
واللى بدايتها كدب اخرها
طلاق
او قلة ادب وعدم احترام


تحياتى لك

  الهدهد الطائر

الجمعة سبتمبر 05, 03:11:00 ص 2008

أتفق إلى حد بعيد مع تعليق ابن حجر العسقلاني فاعتقد بأننا بخير مادمنا نتحدث عن الزواج و لم تخرج الأمور خارج هذا الاطار .
مشكلة تأخر الزواج قنبلة على وشك الانفجار.. فالمجتمع لم يقدم أي حلول لها و في نفس الوقت يطالب بالتمسك بالقيم و التقاليد بصرامة.. ففي الدول غير الإسلامية مثلا فرص الزواج للمسلمات صعبة جدا و قد لا يكون هناك مخرج إلا في التواجد في مناسبات الإسلامية كصلاة العيد أو حتى الجمعة.. ناهيك عن أن كثير من الرجال المتواجدين في تلك الدول هم من النوعية الوصولية التي أتت من أجل جمع المال.

أعتقد ان صاحبة الحوار تحاول حل المشكلة بطريقتها التي قد تختلف عن أخريات.. فالمثل يقول" الطيور على أشكالها تقع".

......تحياتي.....

  الفنان

الجمعة سبتمبر 05, 03:33:00 ص 2008

الله الله شو اسلوب جميل جذبني الموضوع

ولكن مثل ما قالوا الشباب
لا تسمعين كلام البنت هذي

الله على زواج اخر موديل
بالمساجد كلام فاضي

  Unknown

الجمعة سبتمبر 05, 04:46:00 ص 2008

الهدهد الطائر
سعيدة جدا بمشاركتك ايانا الرأى
ووالله انا ايضا ارى انها فرصة للتعرف
لكن لا ان تكون هى الهدف الاساسى للنزول للصلاة
او اننى اتبادل النظرات مع الشباب
او حتى رياء الامهات
تحياتى لك
ولى مناقشة طويلة جدااا ان شاء الله
فى موضوع العفة والزواج

تحياتى لك

  Unknown

الجمعة سبتمبر 05, 04:47:00 ص 2008

الفنان
اهلا بك وكل عام وانت بخير
شرفنى مرورك

  محمد سعد القويري

الجمعة سبتمبر 05, 05:03:00 ص 2008

الأخت نهر الحب
ثاني مشهد _
مشهد مضحك مبكي
لا أقول إلا
أصلح الله الأحوال
وتقبل الله منكِ
صالح الأعمال.

  Unknown

الجمعة سبتمبر 05, 05:33:00 ص 2008

محمد سعد القويرى
تقبل الله منا ومنك صالح الاعمال
واللهم اصلح احوال المسلمين بكل مكان
تحياتى لك

  ahmed_k

الجمعة سبتمبر 05, 08:13:00 ص 2008

هههههههههههه
أيه الكوميديا دي كلها
تصدقي ممكن !! فكره!!
ألا فين الجامع ده اللي بتصلوا فيه
ههههههههههههه

وعندي سؤال واجع قلبي
















المسجد اللي حاطه صورته ده
فين بالضبط
بصراحه حاجه روعه


تسلم إيدك يا إيناس

وتقبلي خالص تحياتي

  .:.-=- ELGaZaLy-=-.:.

الجمعة سبتمبر 05, 08:15:00 ص 2008

هههههههههههههههههههههه
الاسلوب ضحكنى بجد...يا ستى مجتش عليها مصر مليانة ..

كل سنة وانتى طيبة ولا تنسينا من دعائك

  koukawy

الجمعة سبتمبر 05, 09:34:00 ص 2008

و الله ليكي ح في كل اللي قلتيه
الناس بتتردد علي الجوامع...و انا اعني الستات بالذات...لأغراض غير الغرض الرئيسي
سواء موضوغك، او معديه كانت في مشوار فتنام شويه
يعني انا شفت مهازل استغفر الله في المساجد و خاصة ليله 27 رمضان و الأكل و الشيبسي و العيال
و حاجه تقطع القلب
و كان قراري الأخير اني اصلي في ابيت زيك كده بالظبط
رمضان كريييييييم

  romansy

الجمعة سبتمبر 05, 10:11:00 ص 2008

كل سنة وانتى طيبة
انتى اكيد عارفة ان الصلاة ف البيت للبنت افضل كتير ف الصلاة ف المسجد
وبالذات اليومين دول

  kochia

الجمعة سبتمبر 05, 12:58:00 م 2008

هي بتحصل فعلا
بس بما يبقي فيه مخطط منظم هيتضمن كمان لبس ماما يبقي الموضوع تركيب اوي زيادة عم اللزوم
كمان مسجد في حتة راقية؟؟
البيت مركزة اوي بصراحة

مينفعش خالص
بس موضوع بستحق التسجيل
تحياتي

  انسان وبس !

الجمعة سبتمبر 05, 01:07:00 م 2008

ده انتم عليكم دماااااااغ
اقصد صحبتك يعنى
اصل انا بقف احيانا خارج المسجد بس ببقى مستنى حد واحد صاحبى او حد معين وكتير من الشباب اللى واقف بيبقى زيى مستنى حد والده اخوه صاحبه
لكن مش مستنى ينقى عروسه
هو انا منكرش الموضوع جه فى دماغى بس مكنش بينفع لاسباب كتير منها انى لسه خارج من الصلا ومينفعش يعنى

بس اقول ايه ...ربنا يكرمكم ويرزقكم الزوج الصالح

ومتنسيش تحكيلنا عن صاحبتك لو مخططها نجح ولق عريس عن طريق المسجد

كل سنه وانتى طيبه وشكرا على الدعوات

  غير معرف

الجمعة سبتمبر 05, 02:27:00 م 2008

نهر الحب

كل سنة وانتى طيبة

انتى عارفة الشغلانة دى شغلانة تكسب

البنات اليومين دول مش سايبن مناسبة

وعليهم دماغ مبدعة

رمضان كريم

  غير معرف

الجمعة سبتمبر 05, 02:39:00 م 2008

ههههه
والله ونعم الصلاة والخشوع
وأنا زيك والله بفكر الناس بتروح المسجد تصلي مش تتعرف وتتجوز
ربنا يحفظنا ويحفظ بنات المسلمين من كل سوء
كل عام وانتي بخير

  Unknown

الجمعة سبتمبر 05, 03:20:00 م 2008

احمد
ازيك يارب تكون بخير
اولا شكرا على حاجة كوميدا بس دا واقع والله وانا اندهشت من ردة فعل الناس كمان
اما المسجد فهو لصورة مسجد من على النت فعلا اعرف مكنة بالتحديد

كل الاحترام لك احمد
كل عام وانت بخير

  Unknown

الجمعة سبتمبر 05, 03:24:00 م 2008

الغزالى
والله معك حق مصر مليئة بالسلبيات
ولا حول ولا قوة الا بالله
شكرا لمرورك
كل عام وانت بخير

  حـــــدوتـــــة

الجمعة سبتمبر 05, 03:39:00 م 2008

السلام عليكم

انا قريت الموضوع كويس وقريت التعليقات
وشايف ان التيار العام رافض الموضوع ده
بس انا متفق مع راى ابن حجر العسقلانى
وشايف ان من حق البنت انها تحلم بالجواز وانها تخلق لنفسها فرص
وفى غير صحبتك كتير بيعملوا كده بس مش فى الجامع دول بيلبسوا اشيك واديق واقصر حاجة عندهم وبيروحوا الافراح واعياد الميلاد عشان يتشافوا هناك
لكن دى بتروح الجامع عشان تتشاف من ام العريس وحتى لو كانت نيتها كده بس يعنى مش نيتها تصلى انا اعتقد ان ده مش عيب ولا حرام
بس الموضوع ميتعداش كده يعنى تطلع برة الجامع وتبص وتبتسم كده الحكايه هتختلف
موضوع جميل جدا ويستحق المناقشة

سلالالالالالالالالالالالالالالالالالالالالالالالالالالالالام

  Unknown

الجمعة سبتمبر 05, 03:52:00 م 2008

koukawy
فعلا فى اكل وكلام وبكاء بصوت
ونميمة فى مصلى السيدات كل دا للاسف حقيقى
كل الستحية
وكل عام وانت بخير

  Unknown

الجمعة سبتمبر 05, 03:54:00 م 2008

romansy
اهلا بك والله الصلاة هى عبادة الوقوف بين يدى الله بخشوع
ففى اى مكان تكون لكن بضوابط
كل الاحترام لك

  Unknown

الجمعة سبتمبر 05, 03:56:00 م 2008

kochia
ايوة انت ركزت على نقطة الوصولية
والاصطناع
ودا مرفوض لان ما بنى على باطل فهو باطل


تحياتى

  Unknown

الجمعة سبتمبر 05, 03:58:00 م 2008

انسان بلا عنوان
اهلا بك ان شاء الله اكيد هقولك
وربنا يعف بنات وشباب المسلمين يار العالمين
كل عام وانت بخير

  Unknown

الجمعة سبتمبر 05, 04:09:00 م 2008

المحارب المتيم
عارف والله البنات كمان معهم حق
عايزين العفة ودا طلب بسيط
يعنى من حق اى انسان الاستقرار

كل الاحترام

  Unknown

الجمعة سبتمبر 05, 04:12:00 م 2008

حدوتة
معك حق لكن فى بعض الاشياء التى تستحق الوقوف عندهااا
وعلى فكرة انا اؤيد ان يكون للمساجد دور ايجابى فى حياتنا الاجتماعية
مرحبا بك وبفكرك وبنقاشك اى وقت

تحياتى

  غير معرف

الجمعة سبتمبر 05, 04:24:00 م 2008

والله كلنا بندور على الاستقرار

المهم

السلام عليكم


بصى يا ستى

انا سبتلك واجب تدوينى عندى على المدونة

وهو واجب جديد وجرئ وجميل ومن تأليفى

تعالى شوفيه

  tarek alghnam

الجمعة سبتمبر 05, 04:49:00 م 2008

هههههههههههه
والله عندك حق
فعلا كتير من البنات يذهبوا للمسجد بنيه ان الله يرزقهم بزوج
بس للامانه مش كل البنات
وعموما مش عيب ان بالمسجد نتكلم معى ام بنيه ان تلفتى نظرها بأن هناك عروس لابنها البنات عاوزة تتستر
واهى بدور على الحلال لان الحرام تفشى
وقديما قالوا اخطب لبنتك ولا تخطب لابنك
ولى سؤال مارائيك فى هذا المثل
ودمتى بحفظ الله

  Unknown

الجمعة سبتمبر 05, 04:51:00 م 2008

عرفة
لية بس التكليف داا
ربنا يخليك دا حتى انا صايمة ههههههه
حاضر عرفة
عيونى ربنا يستر


تحياتى

  Unknown

الجمعة سبتمبر 05, 04:52:00 م 2008

أ/طارق
الحلال والعفة غاية غالية فى كل الاحوال
لكن لها ضوابط
اما عن رائ فى المثل
فهقولة لك ان شاء الله لكن ليس الان

  ياسر

الجمعة سبتمبر 05, 05:54:00 م 2008

نهر كل سنة وانتي طيبة
رمضان كريم
اعادة الله علينا
وعلي الامة الاسلامية
بالخير واليمني والبركات
صدقيني بجد من الصبح بقراء
في البوست دة ومخدود من تفكير
وعقول الناس الا بيفكروا بي اسلوب
الباحثة عن عريس دي هم يضحك وهم يبكي
اي صلاة تنفع لها دي الا بتخرج من بيتهم ونيتها
جامع شيك ونتعرف علي طنط وشباب واقفين قدام المسجد
ما تروح صالة افراح احسن ولاا صالة تعارف
اهي دي فكرتني ببعض البنات الا من اصول عربية
هنا في فرنسا تروح تصلي الجمعة بقميص وبنطلون جنس
وقبل دخولها باب المسجد تغطي شعرها تخلص صلاة
و اول ما الامام يسلم يقلعوا الحجاب بتاعهم
بس الفرق بينهم وبين البنت دي هما مش بيدورا
علي عريس لان كل واحدة منهم عندهاصاحبها
وليست زوجة شرعا
حاجة تشل بجد
رمضان كريم
الله يهدينا يارب
اسف علي الاطالة
تحياتي

  Unknown

الجمعة سبتمبر 05, 07:19:00 م 2008

ياسر
والله الحال اللى بتقوله لاسف يحزن بجد
بس اقولك ان البحث عن الحلال لا عيب فيه
لكن فيه له ضوابط
ربنا يعفنا

تحياتى لك ياسر

  الدفاع

الجمعة سبتمبر 05, 08:45:00 م 2008

كل عام وانتى بخير
ياخوفى ليكون شباب المناطق الغير راقيه هما اللى بيروحوا هما وامهاتهم مساجد المناطق الراقيه
تبقى صاحبتك هاتاخد مقلب ويكون الجزاء من جنس العمل

وانااؤيد كلام ابن حجر العسقلانى
تحياتى

  عدنان أحمد

الجمعة سبتمبر 05, 08:54:00 م 2008

السلام عليكم

ازيك كل سنه و انتِ من الله أقرب و على طاعته أدوم

بصراحه انا اؤيدك جدا في ردودك على البنت
بس مش معنى كده انك ماتروحيش المسجد
طبعا انتِ مش مكلفه بصلاه في المسجد ماختلفناش
بس طالما كنتِ بتروحي يبقى بلاش تقطعي عشان حاجه زي كده

تحياتي الشديده ليكي
و كل سنه و انتِ طيبه

  Unknown

الجمعة سبتمبر 05, 09:04:00 م 2008

الدفاع
تصدق عمرها ما جت ببالى الفكرة دى
هههههههههههه
كل عام وانت بخير

  Unknown

الجمعة سبتمبر 05, 09:06:00 م 2008

اسير حبيبتى
ازيك كل عام وانت بخير
انت معك حق
ان شاء الله احاول اروح تانى
رمضان كريم
واحترامى الشديد لك

  علي محـمــــــد

الجمعة سبتمبر 05, 09:21:00 م 2008

السلام عليكم

الاخت نهر الحب

بصراحه واعتراف مني انا قمت بالتصويت على الاستفتاء الموجود في مدونتك :(
واخترت الاختيار الأخير - يعني ممكن تنقصي صوت من الاختيار الاخير - وانا بصراحه صوت مو لأني اشجع او ارفض الفكره بس صوت من نظرة محايد :) - الرجاء عدم الضرب او استخدام للاسلحه البيضاء في ردك علي :)

في امان الله

  Unknown

الجمعة سبتمبر 05, 09:54:00 م 2008

العزيزة الغالية

نهر الحب

كل ده يطلع من بنات اليومين دول !!

الحمد لله اتجوزنا وخلفنا بس المشكله عندى بنتى فى الصف السادس الابتدائى بتروح تصلى مع زميلاتها التراويح فى مسجد مجاور لنا
ليكون البنت بترسم من دلوفتى ؟؟؟

ربنا يستر علينا وعلى ولايانا
كل عام وانت بخير وربنا يرزقك بابن الحلال واكيد نصيبك سوف ياتى من المسجد من الشغل نصيبك لن يخطئك ابدا فاستعدى له وربنا يوفقك

  dalia

الجمعة سبتمبر 05, 10:03:00 م 2008

نهر الحب

أنا دلوقتي فهمت ليه زحمة البنات غير المحجبات على التروايح تدخل يالجينز الضيق الجامع ثم تطلع الايشارب من الشنطة وتصلي عادي جدا ثم تطلع وسط زحمة الرجالة عادي جدا طبعا مش عايزه اظلم كل البنات غير المحجبة بس ربنا يهدي الجميع ويجعله عامر

  ابن مصر

الجمعة سبتمبر 05, 11:01:00 م 2008

اختى العزيزة/نهر الحب كل عام وانتى بخير بمناسبة رمضان المبارك هوه أجمل حاجة فى شهر رمضات امتلاء المساجدبالمصلين من الرجال والنساء ودى ظاهرة جميلة لكن اذا اقترنت العبادة بالرياء فدى حاجةغريبة وادعو للجميع بالهداية وفعلا موضوعك جميل وفعلا بيحصل فى المساجد فى رمضان مع خالص شكرى

  Unknown

السبت سبتمبر 06, 01:45:00 ص 2008

على محمد
اهلا بك تانى ومش هستخدم اى سلام ابيض هههه عموما جميل ان تعبر عن وجهة نظر تتبناها او يتبناها غيرك
اهلا بك بأستمرار
تحياتى

  Unknown

السبت سبتمبر 06, 01:47:00 ص 2008

أ/ حسن محمد
والله هى وسيلة لمحاولة الزواج
ولا تقلق اكيد بنتك لسة شويات على ما تفكر فى العريس
ربنا يقدر لنا جميعا الخير
كل الاحترام لك

  Unknown

السبت سبتمبر 06, 01:48:00 ص 2008

dalia
والله احنا مش نقدر نحكم على النوايا
ربنا يعف بنات ونساء المسلمين

  Unknown

السبت سبتمبر 06, 01:50:00 ص 2008

ابن مصر
اللهم اجعل اعمالنا خالص لوجهك الكريم
والله للاسف فى رياء فى كل شئ
ودا سببه قلة الايمان وحب المجتمع للمظاهر


تحياتى
وكل عام وانت بخير

  -_-

السبت سبتمبر 06, 05:47:00 ص 2008

ربنا يتقبل منا و منكم

  yasmine Bashaar

السبت سبتمبر 06, 03:40:00 م 2008

كل سنة وانتى بالف صحة وسلامة

على فكرة انا حصلى موقف زى ده فى المسجد

واحدة محترمة كده جات سالتنى انت مخطوبة قولتها لا... انا متجوزة

قالتى ... ربنا يوفقك ... ومشيت

الجواز عن طريق المسجد حاجة كويسة بس مايكونش انا راحة المسجد علشان اتجوز
انا راحة علشان درس او صلاة او حفظ قرآن .

ويارب يرزق كل البنات بالازواج الصالحين

ورمضان كريم

  Unknown

السبت سبتمبر 06, 03:53:00 م 2008

sharm
منا ومنكم يارب العالمين
شكرا لمرورك

  Unknown

السبت سبتمبر 06, 04:10:00 م 2008

yasmine Bashaar
زى ما انتى قلتى هو موقف متكرر
وليس عيب لكن النية والصدق ركائز اساسية

تحياتى لك ورمضان كريم

  Simbawy

السبت سبتمبر 06, 04:44:00 م 2008

السلام عليكم
وشهر بمارك عليكِ يا نهر وعلى جميع المارين من هنا

مقدرتش امنع نفسي من الابستام وانا اقرا الموضوع .. وكنت عمال اردد كلمة واحدة (فاكرين اللي حصل ده حاجة غريبة او كبيرة يعني) أمال لو شوفتوا اللي شوفته وعرفتوا اللي عرفته .. لاء وفين !!

لو قلت لكم فين يمكن شعركم يقف اصلا (يستثنى من ذلك الصلع) .. أو تسبهلوا (يستثنى منهم ايضا اللي فطر فول) ..

ربنا يصلح الحال .. ويهدي شباب وشابات المسلمين العزاب منهم والمتزوجين ويبعد عنهم وساوس الشياطين ويرزفهم الستر في الدنيا والاخرة

ودمتم في حفظ الله

  همس الاحباب

السبت سبتمبر 06, 05:11:00 م 2008

كل سنة وانتى طيبة
ورمضان كريم
هو انتى جااية يوم السبت يا خسارة
يلا اللهم انى صائم
ههههههههههههه

  Unknown

السبت سبتمبر 06, 05:49:00 م 2008

هههههههههههه بجد حلوه حكاية الزواج من المساجد دي أنا حاسس ان الجامع اتقلب نادي أو كافيه للأسف :(
الواحد بيروح الجامع علشان يصلي لربنا مش علشان حاجه تاني بس للأسف بقي الكلام غير كده خالص اليومين دول

  Unknown

السبت سبتمبر 06, 06:13:00 م 2008

simbawy
اللهم امين
وشرفنى جدا مرورك رغم انك مش قلت عن اللى شفتة ؟؟؟

  Unknown

السبت سبتمبر 06, 06:14:00 م 2008

همس الاحباب
ان شاء الله جاية عندك مانع ولا اية ؟

هههههه
تقبل الله منا ومنكم صالح الاعمال

  Unknown

السبت سبتمبر 06, 06:15:00 م 2008

هيثم الكاشف
نورت وتقبل الله منا ومنكم صالح الاعمال

  زُمُرده

الأحد سبتمبر 07, 01:43:00 ص 2008

كل سنه و انتِ من الله أقرب و على طاعته أدوم

موضوع حقيقي اوووووووي
عارفه المشكله ايه
اننا بلد مظاهر وبس

قليلين اللي بيروحوا لربنا

هو وهي رايحين لنفس الاسباب

يمكن ظروف مجتمع ومشاكل شباب وبنات
بس مش كده الحل
لازم تكون نيتهم لله وانهم رايحين يصلوا
مش شكل وخلاص

الطيبون للطيبات والخبيثون للخبيثات

انا اعتزلت الجامع زيك

  Unknown

الأحد سبتمبر 07, 02:31:00 ص 2008

زمردة
ازيك كل عام وانتى بخير
فعلا احنا بلد مظاهر وشكليلات لابعد حد
لاحول ولا قوة الا بالله

تحياتى لك

رمضان كريم

  ابن الإخوان والأزهر

الأحد سبتمبر 07, 06:19:00 ص 2008

ممتاز...ممتاز....ممتاز

الله ينور

المقال عجبني جداً

بس الشباب الملتزم ده مش أهطل

يعني مش كل واحدة دخلت الجامع في رمضان تصلي بقت ملتزمة و محترمة

دي أول زيارة ليا

  الوان الحياة

الأحد سبتمبر 07, 01:12:00 م 2008

السلام عليكم ورحمة الله وبركاته
الواحد فعلا سمع عن الموضوع ده بس ماكنتش مصدقه اني في كده الواحد بعد كده يخاف يروح المسجد لا يتقال عنه كده انه بيروح يدور علي عريس
لا اله الاانت سبحانك اني كنت من الظالمين

  أمل حمدي

الأحد سبتمبر 07, 01:14:00 م 2008

ابنتي الحبيبة شكرا لدعوة الخير التي دعوتيني اليها
ولكن لظروف مرضي لااستطيع السفر في رمضان كم كنت اتمنى ان اكون معكم ولكن الله اعلم بي
جزاكي الله خيرا انت وكل القائمين على هذا العمل جعله الله في ميزان حسناتكم

  ضــى القمــر

الأحد سبتمبر 07, 02:23:00 م 2008

يااااااه ..

معقول فى ناس بتفكر كده ..
وبتشوف الموضوع من النظرة دى .
بس أكيد .. لأن كل حاجه بيدخل فيها الرسم والتخطيط دلوقتى
الله يهدينا جميعا
حوار رووعه يا نهر الحب
بجد سلمت يداكِ
خطييييييييييير :)
ك عام وانتى بخير

  Unknown

الأحد سبتمبر 07, 03:31:00 م 2008

ابن الاخوان والازهر
اهلا بك
وان شاء الله يكون فى زيارات قادمة
كل عام وانت بخير

  Unknown

الأحد سبتمبر 07, 03:35:00 م 2008

الوان الحياة
اهلا بك والله المستغبرات فى حياتنا كثر
شكرا على مرورك وتعليقك

  Unknown

الأحد سبتمبر 07, 03:37:00 م 2008

ماما
امولة سلامتك
وشفاك الله وعافك انت وكل المرضى يارب العالمين
وجزاك الله خيرا على الدعاء
تقبل الله منا ومنكم صالح الاعمال
يارب العالمين

  Unknown

الأحد سبتمبر 07, 03:38:00 م 2008

ضى القمر
الحمد لله ان الحوار عجبك
وجزاك الله خيرا على المرور
وكل عام وانتى بخير ان شاء الله

  Unknown

الأحد سبتمبر 07, 05:14:00 م 2008

يا نهار اسوح دة بجد دة؟؟؟؟ لا حول ولا قوة الا بالله حتى الصلاة مش عايزين ياخدوا ثوابها ..........
المهم اسلوبك شدنى لحد اخر كلمة برافو عليكى........
كل سنة وانت طيبة وابقى صلى فى البيت احسن والله

  Unknown

الأحد سبتمبر 07, 06:04:00 م 2008

enjy
اهلا بك كل سنة وانتى طيبة
كل شئ فى عصرنا الحالى وارد

تحياتى ورمضان كريم

  ba7re

الأحد سبتمبر 07, 09:18:00 م 2008

مش عارف المفروض اضحك و لا العكس
البوست فى اوله الم عميق و كارثة و غياب ضمير
و فى اخر تناقضات مجتمع
و فى وسطه خير

الاول ربنا يكرمكوا و تقدروا تعملوا حاجة فى تجمع 13 سبتمبر

و كمان بتمنى لك شهر مقبول و عتق من النار

اما عن مسجد الشاطئ فهو عشق خاص
كل المساجد بيوت الله بس فيه مسجد قريب للقلب قبعد المسجد الحرام و المسجد النبوى يأتى عشقى لمسجد الشاطئ ثم المجمع الاسلامى ببورفؤاد
بس مش المهم المسجد فعلا المهم هروح اعمل ايه ؟
بس كلام فى سرك مصلى النساء فى بعض المساجد الافضل ضوضاء أثناء الصلاة و صريخ اطفال و تشويش على المسجد عامة
و رمضان كريم

  Unknown

الأحد سبتمبر 07, 09:32:00 م 2008

ba7re
كل سنة وانت طيب
والله ربنا يقدرنا ونرسم بسمة صغيرة على وجة احد المرضى يارب
اما عن المصلى النسائى فى اغلب المساجد فللاسف دا الحال السائد
ولا حول ولا قوة الا بالله
كل عام وانت بخير

  هانى زينهم

الأحد سبتمبر 07, 09:59:00 م 2008

عارفة المثل بتاع مسمار النعش اهو البوست ده مسمار النعش فى حياتنا الحاضرة .
لما الصلاة كمان تبقى عشان حد يتعرف على حد يبقى كويس قوى الحال اللى احنا فيه ويبقى ربنا كريم معانا قوى كمان
صدقينى من اكتر الموضوعات اللى حسيت بعدها بانه ما بقاش فى فايدة فى البلد دى
ربنا يثبتك ويثبتنا معاكى اصلها شكلها كدة قربت قوى
كل سنة وانت طيبة وابقى صلى فى البيت بعد كدة

  Unknown

الاثنين سبتمبر 08, 12:09:00 ص 2008

هانى زينهم
فى امل طول مافى ايمان بالله ومحاولات جادة للاصلاح حتى رغم ان الموضوع ظاهره خطأ الا انها طلبت العفة وشرع الله


كل عام وانت بخير

  Unknown

الاثنين سبتمبر 08, 12:31:00 ص 2008

السلام عليكم ورحمة الله وبركاته
أختى الفاضلة
الأعمال بالنيات ولكل أمرئ مانوى ...
الله سبحانه وتعالى مطلع على القلوب وهو الذى يجزى كل أمرئ على نيته ..
ونسأل الله تعالى أن يهدنا إلى سبل الهداية والرشاد.
ونساله تعالى أن ييسر زواج بناتنا وشبابنا ويعصمهم من الفتن .

وأحيى طرحك الرائع

  بنت النيل

الاثنين سبتمبر 08, 12:34:00 ص 2008

السلام عليكم ورحمة الله وبركاتة

كل عام وانتى بخير يا نهر

اولا انا بتاسف على تاخير وقلة زيارتى

ثانيا عايزة اقولك على حاجة

الصلاة فى البيت للمراة احسن كتير

وكمان عرفت من كلامك انك طيبة جدا

وهى دى تفكيرة مش سليم

وانصحك تبعدى عنها الله يهديها

الواحد يروح علشان ربنا وعلشان يصلى

وياخد حسنات

ولا يروح علشان العريس وتاخدى سيئات

الله يهديها

طولت عليكى معلش

واتاخرت عليكى فى تعليقى

بس با نهر اعذرينى غصب عنى

فين وفين لما بتدخل النت

وكا عام وانتى بالف خير

بنت النيل

  mostafarayan

الاثنين سبتمبر 08, 05:21:00 ص 2008

بالنسبة للتبرع هيكون الساعة كام وايه تفاصيله

  Unknown

الاثنين سبتمبر 08, 05:31:00 ص 2008

أ/ محمد الجرايحى
اهلا بك فعلا الاعمال بالنيات
وعلينا ان نصدق عهدنا ونيتنا مع الله عز وجل
تحياتى لك

  Unknown

الاثنين سبتمبر 08, 05:33:00 ص 2008

بنت النيل
والله وحشتنى كل عام وانتى بخير
ورمضان كريم
هى مش وحشة بس ظروف المجتمع هى اللى مش صح
تحياتى لك
ورمضان كريم
تقبل الله منا ومنك صالح الاعمال

  Unknown

الاثنين سبتمبر 08, 05:36:00 ص 2008

مصطفى ريان
اهلا بك التبرع وكل عاجة عنه لو ضغط على اسم قوس قزح راح تعرف تفاصيلة
اللى هى كالتاتى ان شاء الله هنتقابل الساعة 3 فى مستشفى ابو الريش ومعنا هدايا عينية او مالية او ادوية
للاطفال اللى عمرهم من 5 سنوات الى 12 سنة ونحاول نرسم بسمة على وجههم
وبعدها ان شاء الله هنفطر كلنا مع بعض فى حاتى ابو خالد فى شارع شامبينون

ان شاء الله سو او قوس قزح راح يروحوا
المستشفى يوم الخميس ويبلغون بالاشياء الضرورية ومنها نحدد ان شاء الله المطلوب
شاكرة جدااا اهتمامك
وربنا يقدرك على فعل الخير

  بنت سيناء..

الاثنين سبتمبر 08, 10:18:00 ص 2008

نهر الحب..بوست هادف والاعمال بالنيات صحيح

مش كلهم كدة قليل جدا زى الخت


جزاكى الله خيربل

  زهرة الجنة

الاثنين سبتمبر 08, 11:47:00 ص 2008

السلام عليكم
أتمني تكوني بخير

علي فكرة دي مش صلاة تراويح
دي خطة لكيفية القبض علي عريس ههه
صديقتك دي دماغها غريبة جداا
بس صدقيني في زيها كتير
لاني صديقاتي بعضهم ليه نفس التفكير

ومتناسين ان الأعمال بالنيات
لكن ياتري وهما راحيين للمسجد نيتهم تكون ايه بالضبط

البوست بتاعك هايل جداا
تقبل الله صيامك وقيامك ودعائك
رمضان كريم
أرجو أن نتواصل معا


ملحوظة:
بحاول دخول مدونة همس القلوب ولكن لا أصل اليها فهل تم تغيير الرابط

تحياتي لكي
زهرة

  محمد فاروق الشاذلى

الاثنين سبتمبر 08, 01:48:00 م 2008

ما شاء الله، أول اسمع إن المساجد بقت صالونات تعارف للزواج.
اللهم لا تجعلنا من الذين اساءوا وهم يحسبون أنهم يحسنون صنعاً.

  جنّي

الاثنين سبتمبر 08, 04:10:00 م 2008

السلام عليكم
عن عمر بن الخطاب رضي الله عنه قال : قال رسول الله صلى الله عليه وسلم إنما الأعمال بالنيات وإنما لكل امرئ ما نوى فمن كانت هجرته إلى الله ورسوله فهجرته إلى الله ورسوله ومن كانت هجرته لدنيا يصيبها أو امرأة يتزوجها فهجرته إلى ما هاجر إليه ) البخاري

فصديقتك غيرت نيتها الى اشياء اخرى غير الصلاة ..

  غير معرف

الاثنين سبتمبر 08, 04:26:00 م 2008

السلام عليكم نهر الحب

وضحكتينا والله باظهارك لهذه الاسرارالعسكرية النسائية -أظنك لازم تمشى اليومين دول ومعاكى حراسة ههههههههههههه- المهم خير ونورتى مدونتى المتواضعة بدعوتك الغالية والمشكلة ان عندنا يومها افطار منتدى موقع كل الطلبة

على العموم ملحوقة
رمضان كريم و يلا سلام

  tarek alghnam

الاثنين سبتمبر 08, 05:26:00 م 2008

مرور للتحيه والسلام
ودائما اسعد كلما دحلت مدونتك لما فيها من مضمون ومافيها من حب للخير وللوطن
تقبلى تحياتى
ومتعك الله بالحب والعافيه

  مقاطعـــــــــــــون

الاثنين سبتمبر 08, 05:35:00 م 2008

http://mokat3een.blogspot.com/
شارك حمله مقاطعون نحن نرفض اى قرش يدفعه العرب للتتربح من ورائه اسرائيل وغيرها رافعه شعار ان العرب يستفيدون من وراء شركاتهم ولا تتسببوا فى قطع ارزاق الناس انهم يضغطون علينا بلقمه خبز
فسحقا لاى لقمه تاتينا منهم فى مقابلها الاف يموتون من اموالنا شارك ولا تتردد
وجزاكم الله كل خير

  Unknown

الاثنين سبتمبر 08, 05:55:00 م 2008

بنت سيناء
اهلا بك وفعلا فى كتير مخلصى النية مع الله عزوجل تحياتى لك

  Unknown

الاثنين سبتمبر 08, 05:56:00 م 2008

زهرة
الناس كلها مختلفة عن بعض كلا بفكرة الخاص سبحان الله
ربنا يجعلنا مخلصى النية له
شكرا لمرورك وسؤالك
اما عن همس القلوب فلم اغير رابطها

  Unknown

الاثنين سبتمبر 08, 05:57:00 م 2008

قلب مصرى
اهلا بك ورمضان كريم

  Unknown

الاثنين سبتمبر 08, 06:04:00 م 2008

جنى
السلام عليكم
فعلا لكل امرئ ما نوى
جزاك الله خيرا جنى

  Unknown

الاثنين سبتمبر 08, 06:05:00 م 2008

جمعاوى
اهلا بك كل عام وانت بخير
ولا متخفيش فعلا بمشى بحماية هع
اما عن الافطار فأن شاء الله تتعوض
رمضان كريم

  Unknown

الاثنين سبتمبر 08, 06:06:00 م 2008

أ/ طارق غنام
اهلا بك
اى وقت وكل وقت فهى مدونتك
رمضان كريم

  كـــيــــــــارا

الاثنين سبتمبر 08, 06:46:00 م 2008

يالهوووووووووووووووووووووووي ده صلاه وعباده

ايه الكلام ده انا تنحت

لا وايه بيختاروا الجوامع كمان

لاحول ولا قوة الا بالله

لا يبقي الصلاه في البيت افضل للبنت بدل اما تنزل اي جامع

صحبتك دي ايه وبتفكر ازاي

لا حول ولا قوة الا بالله

  أكون أو لا أكون

الاثنين سبتمبر 08, 06:50:00 م 2008

1- موضوع الضحايا... أو الشهداء... حسبنا الله ونعم الوكيل... إنا لله وإنا اليه راجعون... ربنا يكون في عون اهاليهم...
2- موضوع التبرعات... ربنا يوفقكم على الخير... وياريت كنت اقدر اجي... وصيام مقبول ان شاء الله...


ههههههههههههههههههه... موضوع المسجد... مش حقول مستغربه... لاني شفت حالات رياء كتير واستخدام الدين كوسيله للوصول لاغراض ثانيه... بس نصيحه ابعدي عن البنت ده... لان شكلهم متفقين طالما انهم يطلعوا ويلاقوا الشباب عن باب المسجد...الله يهديهم...

تحياتي...

  Unknown

الاثنين سبتمبر 08, 07:26:00 م 2008

كيارا
اهلا بك
ومش تتنحى ولا حاجة فى حاجات كتير غريبة جدا فى مجتمعاتنا
تحياتى لك

  Unknown

الاثنين سبتمبر 08, 07:27:00 م 2008

اكون او لا اكون
اهلا بك وربنا يتقبل منك صالح الاعمال
للاسف حاجات استغلال الدين كتير جداا ومش بس فى مصر لا فى كل العالم ولكل الاديان

تحياتى لك
وكل عام وانتى بخير

  Jhennifer Cavassola

الاثنين سبتمبر 08, 09:22:00 م 2008

Congratulations by blogging!
I love it all!

Much peace and be with God!

Mato Grosso - Brazil


المدونات التهاني من قبل!
احبه جميع!

الكثير من السلام وكونوا مع الله!

ماتو غروسو -- البرازيل

  Jhennifer Cavassola

الاثنين سبتمبر 08, 09:27:00 م 2008

I could not comment on another blog.

Lindas poetry. Well deep!
Stay with God


انني لا يستطيع التعليق على آخر بلوق.

غرامة الشعر. بالاضافة الى العميق!
البقاء مع الله

  يوميات مواطن مصرى

الاثنين سبتمبر 08, 11:18:00 م 2008

جميل اوى
اجمل حاجه فى القصه انها حقيقيه
اعرف بنات كتير اوى بيروحوا يصلوا فى المسجد من اجل الزواج
وممكن البنت يكون سلوكها سيء بس بقى العريس الطيب الغلبان لمجرد انه شافها خارجه من المسجد وطبعا والدته كلمته عليه كلمتين كويسين من اللى شافته ادامها
الواد عجبته فخطبها واتجوزها وبعد الجواز يلاقيها يا دوب بتقرا الفاتحه وتظهر على حقيقتها

بوست جميييييييل

  عاشــــــ النقاب ـقــــة"نونو"

الثلاثاء سبتمبر 09, 12:54:00 ص 2008

هههههههههههههههههههه
اللهم لا تؤاخذنا بمافعل السفهاء منا
رمضان كريم
على فكرة ارسلت الاضافة ولم تصلك الظاهر
ضيفيني انتي ولا صرفتي نظر؟؟؟؟

  غير معرف

الثلاثاء سبتمبر 09, 01:07:00 ص 2008

ربنا يحفظك اختى من كل سوء وخاصة اصدقاء السوء
(( ان شاء الله يوم السبت الموافق 13/9
هيكون فى تجمع للتبرع فى مستشفى ابو الريش للاطفال
بناء على اقتراح قوس قزح
اتمنى انى اشوفكم هناك
تعالوا نحاول نرسم بسمه ونطهر ذنب
وبعدين هيكون فى افطار جماعى ))
كنت اتمنى ان اكون معكم بهذا العمل الخيير لكنها الغربة وبعد المسافات لكنى فى نفس الوقت ساكون بالحرم المكى وسادعوا لكم بالقبول
تمنياتى لكم بالسعادة فى الدارين

  صباح الصباح

الثلاثاء سبتمبر 09, 07:57:00 ص 2008

بجد مع ان الموضوع عجب العجاب الا انة بجد وممكن يحصل مع اختلاف صغنن فى الاماكن انما الكور واحد

الحياة بقت كلها وشوش خشب وستار من ورا ستار وماحدش عارف فية الحقيقة والا اية اللى هوة عاوز يوص لة وكلة كلة خايف من المستقبل

  Unknown

الثلاثاء سبتمبر 09, 07:32:00 م 2008

يوميات مواطن مصرى
للاسف دا بيكون خطا متبادل
وزى ما فى بنات وحشين فى كمان رجال متصنعين جداا
تحياتى لك

  Unknown

الثلاثاء سبتمبر 09, 07:33:00 م 2008

عاشقة النقاب
وحشتينى بجد
كل عام وانتى بخيرر

  Unknown

الثلاثاء سبتمبر 09, 07:34:00 م 2008

انا ما نسيتك يا وطن
اهلا بك
كل عام وانت بخير
شاكرة لك ردك
تحياتى لك
ورمضان كريم

  Unknown

الثلاثاء سبتمبر 09, 07:35:00 م 2008

صباح الصباح
والله للاسف الناس بتهتم بالظاهر اكثر كما ان الاغلب احترف الكذب
وللاسف النتيجة هى الوشوش المنتشرة
تحياتى لك

  elsha3er

الثلاثاء سبتمبر 09, 08:37:00 م 2008

السلام عليكم حاجة جميلة انك تعرضى قضية زى دى بس انا شايف ان صلاة الست فى البيت افضل من المسجد


احمد الشاعر

  Unknown

الثلاثاء سبتمبر 09, 09:16:00 م 2008

الشاعر
اهلا بك والله لكل مقام مقال
شكرا لتعليقك
وكل عام وانت بخير

  نـــــور

الثلاثاء سبتمبر 09, 09:42:00 م 2008

يالهوى
ازيك ياجميله الاول

تصدقى انا كنت بقرا وانا مذهوووووله بجد والله الكلام ده جديد عليا

عموما الحمد لله انى مش بصلى فى المسجد خالص لان الاوضاع هناك بتفرسنى فقررت من السه اللى فاتت انى ماارحش

بس بجد ايه ده انا مش قادره اعبر عن ذهولى

الله يكون فى عونك

صحيح
اول زياره كل سنه انتى طيبه

  غير معرف

الأربعاء سبتمبر 10, 03:41:00 م 2008

السلام عليكم يا نهر ..حاجه تحزن لما يبقا المسجد عندنا قيمته بقت لكده بس عارفه انا كنت قريت حديث فى رياض الصالحين ..معناه ان الرسول بيلعن اى تجاره فى المسجد ..انا للاسف مش فاكراه قوى بس اليى داخل المسجد بنية انه يبيع شئ او للربح فما بالك بالى رايحه بيت ربنا لهدف ما مش بهدف الغرض الاساسى للمسجد وهو العباده ..
بس اليى رايح ينافق ربنا ونيته مش سليمه حتى ولو اتجوزت هيكون بعد كده نظرتها لنفسها ايه لما تلاقى ان ربنا اكرم منها فى كل شئ حتى لو اغضبته ..
ربنا يثبتنا على الصح ويوضح لنا الخير...
رمضان كريم عليكى يا نهر يا حبيبتى وبخصوص زيارة الاطفال انا وضحت لقوس للاسف مش هقدر ...
بس دعواتى ليكوا ربنا يكرمكوا ان شاء الله..

  Tamer Alhosiny

الأربعاء سبتمبر 10, 06:59:00 م 2008

لا حول ولا قوة الا بالله
علي فكرة موضوعك مفاجئة بالنسبة لي
مكنتش متصور ان ده للاسف هو الواقع
وللاسف الحوار ده كشفلي حقيقة موقف مشابه حصل قدامي علي ارض الواقع

لا اله الا الله

للاسف السلام مش بقا هدف
وبقا وسيلة حتي للجواز

اشكرك علي هذا الموضوع الرئع
وتحياتي لجهدك ولمدونتك

تامر الحسيني
انسان عاشق حر

  SHAPE YOUR LIFE (ABOALI)

الخميس سبتمبر 11, 04:31:00 م 2008

حوار جذاب والله ومثمر
يدل على حالنا وعنوسة اخوتنا
يااااااا
صعب والله الكلام فى الموضوع ده
بس حقيقة يجب اننا نفكر فيها بعمق ليه اللى بيحصل ومصلحة مين بنات زاى الفل عاوزه طريق الحلال بس المنادى لسه بعيد

شابة من هناك
اتت من بعيد
تبحث عن شاب
لعله يكون فيه نصيب
تجلس تفكر
عسى ان ياتى يوم فيه ترتاح
يارب البرايا
حافظ لينا على ماتبقى
من فيتات وصبايا
اجلعهن خاشعات
لك راجعاات
وهب لهم شريك الحياه
انت القادر المقتدر

شكرا على البوست المعبر المضحك الباكى

  Unknown

الخميس سبتمبر 11, 05:46:00 م 2008

Habiba
اهلا بك وكل عام وانتى بخير
شاكرة لك مرورك وتعليقك

  Unknown

الخميس سبتمبر 11, 05:46:00 م 2008

عايزة اطلق و
ياستى ولا يهمك المهم ان نيتك وان كان نفسك تكونى معانا
ربنا يجزيك خير يارب

  Unknown

الخميس سبتمبر 11, 05:47:00 م 2008

تامر الحسينى
حياتنا مليئة بالغرائب
شكرا لك على المرور

  Unknown

الخميس سبتمبر 11, 05:48:00 م 2008

ABOALI
جميل جداا ما سطرت سلمت ايدك
وشرفنى مرورك جداا
العنوسة داء يهدد المجتمع ككل
اللهم عفنا يارب العالمين

  ojg

الاثنين سبتمبر 15, 01:12:00 م 2008

عارفة
رغم اني ضحكت في الأول
انما اتغميت بعدين
اصله فعلا بيحصل
ماهو يعني البنات هتعمل ايه
والحمد لله انها راحت المسجد
واهي برضو تعمل حاجه صح
ماراحتش النادي ولا الكافيه عشان تدور علي عريس روش
بصي
رغم اعتراضي ع الطريقه
انما البنات تعمل ايه يا اختي
تنتحر؟؟
:)

  Unknown

الاثنين سبتمبر 15, 07:55:00 م 2008

OJG
هههههههه
بصى لنا حديث طويل فى الموضوع دا لا تتعجلى
قولى يارب
ههههههههههه

  amr

الخميس سبتمبر 18, 01:35:00 م 2008

طرح رائع نهر الحب

أول مره أزور المدونه لكن مش أخر مره

ومستنى الجديد

واستفدت كتير من الموضوع ده

ياسلام لو التخطيط ده والدماغ العالى

بتاع صحبتك ده يتحط فى مشروع

او البلد يكون فيها شويه زيها كده

كانت البلد ........

خالص تحياتى

  Unknown

الخميس سبتمبر 18, 05:16:00 م 2008

عمرو
بجد ؟ والله انا متشكرة جداا
ويارب تتكرر الزيارات
دمت بخير